مش أم ولا بنت، زوجة، زوجة

من كام سنة زوجي وأنا كنا بنتكلم في موضوع الزواج.. وازاي في دوايرنا شايفين ناس بتتطلق، وناس عندها مشاكل زوجية، وناس بقت رافضة تتجوز.. 

اتكلمنا في ازاي ناس بعد اقل من سنة اتطلقت بعد فرح ولا الف ليلة وليلة..

واتكلمنا في أهمية دور التوعية لقدسية الزواج.. 

اتكلمنا عن مين بيجي الأول القلب ولا العقل لما الإنسان يفكر يرتبط..

ومن ضمن كلامنا تطرقنا لموضوع المواصفات اللي كل إنسان بيدور عليها في شريك الحياة..

وزوجي يومها قال لي: " مهم كمان إن الإنسان بعد ما يحدد المواصفات اللي عايزها في شريك الحياة، يفكر شريك بالمواصفات دي هيكون عايز مواصفات ايه هو نفسه في شريك حياته..؟"

معلش الجملة مرَكَبة وممكن تلخبط.. اقراها تاني كده..

يعني ايه؟

يعني المرة اللي فاتت شاركت المواصفات اللي كنت عايزاها في شريك الحياة، اللي تساعدني احقق اهدافي من الزواج..بما يتفق مع نيتي من الزواج..

كان دوري بقى افكر، شخص بالمواصفات دي عايزني اكون انا مواصفاتي ايه؟

بالتالي.. 

بعد ما فكرنا في نيتنا من الزواج، واهدافنا من الزواج، وفي مواصفات الزوج، دورنا نفكر 

√ الزوج اللي بالمواصفات دي، ايه المواصفات الأساسية اللي بيدور عليها في شريكة حياته

√ الزوج اللي بالمواصفات دي، ايه المواصفات الثانوية اللي بيدور عليها في شريكة حياته

√ انا فيا ايه من المواصفات الأساسية دي، ومن المواصفات الثانوية دي

√ ايه محتاجة اشتغل عليه او اتحسن فيه علشان اتوفق في شريك حياة بالمواصفات دي..

فيه ناس هتقف مع السطور دي وتهنج..

طيب صبركم عليا..

لما بنفكر في شغل، لو فعلًا نفسنا في شغلانة في مجال معين..

بنبدأ نسأل الشغلانة دي او المجال ده بيعين ناس مواصفاتهم ايه، وبعدين نبدأ نشوف ايه مهارات محتاجين ننميها، ايه دورة أو لغة محتاجين لها علشان نفوز بالشغلانة..

وده بنتكلم على شغل، ما بالك بشريك حياة، بزوج، بالسكن بتاعنا..

مش من باب اولى نعمل التدريب ده ونحضر نفسنا..

ناس هتقول ايه ده، ده مجهود كبير..

ايوه فعلًا.. ايه في الدنيا له قيمة بنوصل له من غير مجهود..

كل حد فينا اكل خلال الأربعة وعشرين ساعة اللي فاتوا وشرب..

الأكل والشرب ده احتاج مجهود من كم بشر علشان الحرث والزراعة والحصاد والتصنيع والتعبئة والنقل والتسويق والبيع..

كل ده مجهود..

الحياة مش الجنة ولا مكان الراحة.. الحياة مكان السعي.. مع استراحات قصيرة لتكملة السعي..

تخيل لو سعيك هو تحسين أخلاقك وتزكية نفسك علشان تلاقي شريك الحياة بالمواصفات اللي انت عايزها وتعمر معاه الأرض وتحيي سنة النبي عليه الصلاة والسلام وتطيعه.. تخيل كم الأجر..

مبدأ جميل قوي اتعلمته وعشت بيه مبدأ اسمه "التسديد"..

يعني مش اي سعي، سعي بتسديد، مش اي تطوع، تطوع بتسديد،

مش اي عمل صالح، عمل صالح مصلح بتسديد، مش اي صدقة، صدقة بتسديد..

مش اي زوج، زوج وزواج بتسديد..

واللي عايز يسدد محتاج يكون مؤهل انه يسدد..

قادر يفكر ويحدد ويقيم ويعدل ويطور ويحسن في نفسه..

ايه المواصفات اللي شريك الحياة اللي نفسك فيه عايز يلاقيها فيك/فيكي؟

خدي بالك.. انت بتدوري على "زوج" مش أب ولا ابن..

احنا بنتكلم على الزواج.. 

يعني بتدوري على راجل يكون ليكي زوج، مش اب يعوضك حرمان ابوكي ولا يدلعك زي ابوكي..

بتدوري على زوج، مش ابن تدلعيه زي ما مامتك بتدلع اخوكي..

فالزوج اللي بتدوري عليه بيدور على زوجة..

مش ام ولا بنت..

مش ام تدلعه زي مامته.. ولا بنت يمارس عليها ابوته..

علاقة زوجية من زوج وزوجة..

اقفي بقى فكري.. الزوج ده اللي فيه المواصفات اللي انا عايزاها، هو عايز "زوجة" مواصفاتها الأساسية ايه؟ ومواصفاتها الثانوية ايه؟

مواصفات اساسية يعني لو مش فيها يبقى الجوازة مش ملائمة،

مواصفات ثانوية يعني مش شرط لإتمام الجوازة، انما لو موجودة فهي Bonus

مثلًا زوجي كان عايز بنت محترمة وامها سمعتها طيبة، دي مواصفات اساسية 

وكان انها تبقى بتعرف تتكلم فرنساوي وبتحب الرياضة من المواصفات الثانوية

فايه؟

ايه المواصفات.. وانت فين منها؟

وطبعًا عارفة/عارف ايه الخطوة الجاية..

خطوة اسمها Closing the gap

يعني اما اشيل مواصفات في العريس لأني مش ناوية ابذل مجهود علشان ابقى مناسبة له،

او ابدأ اشتغل على نفسي لاني متمسكة بالمواصفات دي..

انت فين..لو مش عارف/مش عارفة، افتحي حوار مع حد محل ثقة، من اصحابك او اقاربك او اهلك..

ياللا نفكر علشان نخزي الشيطان، ونوقف سلسال تقليد الغرب في الحياة الحرام..

ونرجع تاني لسنة نبينا عليه الصلاة والسلام..

ياللا نعيد ترتيب افكارنا ونظرتنا للرباط المقدس..

#اتجوز؟_٤

#الزواج

#الأسرة

#المجتمع

#السنة