الجواز مع إشارة المرور

من اكتر الجمل اللي بستعجب لها لما اسمع احد الأزواج بيقول "عمري ما شفت معاه يوم حلو"

ازاي؟ 

طيب يعني من يوم الفرح؟ ولا من كتب الكتاب؟ ولا من الخطوبة؟

طيب من شهر العسل؟

ولا من امتى؟

ولو عمرك ما شفتي معاه يوم حلو كملتي ليه؟

خلفت منها ليه؟

زي اللي بدأ طريق وشاف فيه حفرة وكمل..

ومصمم يقع في الحفرة..

ويطلع يكمل مشي في نفس الطريق..

ويلاقي حفرة أكبر.. ويمشي ويكمل..ويقع..

ويطلع ويكمل..

لحد ما يقع في حفرة تتكسر فيها عضامه ويتفشفش..

ساعتها بس يدرك إن الطريق كان غلط..

وانه غلط لما كمل بعد أول حفرة..

من كان سنة كنت بقرأ كتاب والمؤلف ادى مثل بإشارة المرور..

قال لما الإنسان منا يُقدم على حاجة ويلاقيها متيسرة ومتسهلة،

يفهم إن ربنا سبحانه وتعالى بيديه إشارة خضراء.. إنه يكمل وان سكته مبروكة بإذن الله

ولما يلاقي إن فيه شوية عقبات بسيطة، يفهم إن الإشارة صفراء..

يعني فيه حاجة محتاجة تتغير.. تتعدل..

أما لما يلاقي ان الدنيا مقفلة من كل حتة والموضوع كله صعاب 

وكل ما يتخطى عقبة يلاقي عقبات اكتر ظهرت،

وقتها محتاج يفهم ان دي اشارة حمراء وان ربنا بيقول له ان الطريق ده غلط..

في سلسلة اتجوز، فكرت في موضوع الإشارات ده..

واحدة تُعجَب بواحد.. تلاقي اهلها مباركين الجوازة والعيلتين مرتاحين ومتفاهمين..

وهو مناسب لها.. تفهم ان دي اشارة خضراء..

واحد يتقدم لواحدة.. تلاقي أمه متحكمة فيه ومصممة يعيشوا معاها..

تفهم ان دي اشارة صفراء..

واحدة تحب واحد وابوها يقول لها بلاش ده فيه كذا وكذا.. 

وامها تقول لها بلاش بسبب كذا وكذا..

وتصمم وتضرِب عن الأكل وأهلها يفضلوا ينصحوا فيها.. 

وحتى صاحبتها تقول لها بلاش منه .. 

وكل ده مش شايفة ان دي اشارة حمراء.. وتصمم..

وتتجوز وبعد سنين تقول 

 "عمري ما شفت معاه يوم حلو"

ما يا ست الكل انت اللي مشيتي في طريق اشارته حمراء..

هل كل الجوازات الإشارات فيها حمراء؟

لأ.. اكيد لا..

والا ما كناش هنفتح الفيس بوك كل يوم نلاقي صور افراح وليالي ملاح..

والا ما كناش هنلاقي وظايف عمالة اسعارها تزيد بشكل مبالغ فيه 

زي منظم الأفراح ومصور الأفراح واللي بتحط ماكياج للعروسة وخلافه..

ايه الموضوع؟

الموضوع ان فيه ناس بقت عايزة تتجوز وبس..

يعني المهم اني ابقى عروسة، البس فستان ابيض واتصور..

واصحابي يلبسوا لبس عاري وننزل الصور على السوشيال ميديا..

وناخد لايكات..ويتعمل لنا شير..

الجوازة هتكمل ولا لأ؟ مش مهم..

المهم الشو..

بس كده؟

لا وفيه ناس المهم عندها انها تتجوز.. علشان ما تبقاش عانس..

(سواء راجل او ست)..

والنتيجة أي جوازة والسلام..

طيب والإشارات؟

فترة التعارف والخطوبة فترة مهمة جدًا للطرفين..

إنهم يلاحظوا اشارة المرور..

قد ايه من الوقت خضراء؟

وقد ايه من الوقت صفراء؟

وفي ايه حمراء؟ في اي مواضيع؟

ناس كتير متخيلة ان الزواج بقى على بعضه ملف احمر..

طبعًا ده احد التشوهات الفكرية اللي اسمها تعميم..

مفيش موضوع يشرعه ربنا سبحانه وتعالى ويكون سنة عن النبي عليه الصلاة والسلام 

ويبقى على بعضه أحمر…

وكمان قليل قوي قوي لما يبقى الموضوع اخضر تماما..

علشان كده مهم قوي كل طرف يقف وقفة عقلانية ويتأمل بحكمة الإشارات الصفراء..

ويسأل قد ايه الموضوعات اللي فيها اشارة صفراء هتأثر على الزواج؟

هل ممكن تخليه يتحول لموضوع احمر؟

واحدة مش بتعرف تطبخ..

والعريس عايز يبقى بياكل من ايد مراته وده مهم جدًا له..

وهي رافضة الموضوع شكلًا وموضوعًا… دي اشارة صفراء..

عروسة خطيبها بيشتغل ليل ونهار..

ومش بتشوفه خالص..

واهلها واهله يقول لها استحملي..

وهي حتى مش قادرة تتعرف عليه بسبب انشغاله..

دي اشارة صفراء..

دور الأهل والأصدقاء الحقيقين ايه؟

انهم يشاوروا على الإشارات الصفراء…

ودور المقبلين على الزواج ايه؟

انهم يفتحوا عقولهم وما يعموش عينيهم عن الإشارات الصفراء..

ويجروا بعيد لو لاقوا اشارة حمراء..

لكل زوجة لسه مكملة وهي مش في اشارة خضراء،

لو انت في اشارة حمراء، مهما مر الزمن، هتفضل الإشارة حمراء..

والطريق كان غلط من الأول..

وبس الحمقى هما اللي بيكملوا في طريق غلط.. 

لكل زوج مكمل وفيه اشارات صفراء..

اقعد واتكلم واتفاهم واتناقش.. 

وعالجوا مع بعض الإشارات الصفراء

علشان البيت يستقيم..

ولأن تجاهل الأصفر مش معناه ان الطريق اخضر..

معناه إن مع مرور الوقت الأصفر هيتحول لأحمر..

ربنا سبحانه وتعالى ميز الإنسان بالعقل..

فعيب علينا نغمض ونمشي في طرق مش تمام..

خلينا نفتح ونعقل ونلاحظ الإشارات..

وندعي ر

بنا ينور لنا ويلهمنا..

ونخلي بيتونا خضراء علشان تحل فيها البركة..

 #اتجوز؟_٣٦

#الزواج

#اﻷسرة

#المجتمع

#السنة