اشارة مرور الزواج
في مرحلة التعارف بين وبين زوجي العزيز
(سنة ١٩٩٧) استشار حد بيثق فيه ويحسبه على خير في انه يرتبط بيا..
والراجل محل الثقة قال له ركز على ٣ حاجات..
اولًا شوف امها.. لأن البنت مهما راحت ولا جات، امها دايما بتكون القدوة والنموذج الأول لها..
ثانيًا اديها ظرف وقول لها فيه حاجة خاصة جدًا ومهمة قوي واوعي تفتحيه وشوف هتعمل ايه..
ثالثاً اختلف معاها على حاجة وازعل منها وشوف هتتصرف معاك ازاي، شوفها هتعمل ايه عند الإختلاف والزعل..
زوجي العزيز عمل كده.. وعديت في التلاتة
لاقى امي شخصية محترمة، سمعتها طيبة، ومتفانية مع عيلتها..
ولاقاني أمينة في التعامل مع الظرف، اللي كان سايبه أمانة معايا..
ولاقاني مهتمة بيه ومستعدة اسمع ونتناقش ونتفق ومش هاين علي زعله..
من كام سنة كنت بقرأ كتاب والمؤلف ادى مثال بإشارة المرور..
والمثال ده فكرني بموقف زوجي والإختبارات التلاتة..
المؤلف في الكتاب شرح ازاي ربنا بيبعت للإنسان اشارات لما بيكون مُقبل على حاجة..
اشارة خضراء يعني الموضوع تمام وتوكل على الله
اشارة صفراء يعني تمهل، فيه حاجة محتاجة توضيح او تعديل..
اشارة حمراء يعني الطريق اخره وحش، اهرب، اجري، انفد بجدلك..
ايه علاقة ده بسلسلة "اتجوز.."
هو لب السلسلة..
تلاقي بنت متقدم لها عريس.. والإشارة خضراء..
العريس مناسب.. واهلها موافقين.. وهي مستلطفاه…
وكل ماشي بيسر..
انما هى رافضة..
ليه؟ خايفة تتجوز..
أو تلاقي واحد بيحب واحدة،
من دين مختلف، واهله رافضين،
وفي خلاف ونزاع..
وامه مش بتنام الليل..
واهلها بيهددوه وبيخانقوا معاه..
وهو مصمم يكمل..
وعامل نفسه اعمي، مش شايف الإشارة الحمراء..
طيب والصفراء..
الصفراء دي بتقول لك..
طول فترة التعارف.. فترة الخطوبة..
انتبه.. ركز..
هل فيه إشارات حمراء وانت مصمم تتجاهلها؟
الإشارات دي بتيجي منين؟
اصحابك يقولوا لك ده مش مناسب..
بصي عقله مقفل ازاي..
بصي بيتحكم فيكي ازاي..
بصي بخيل ازاي..
وانت؟ تتجاهلي الإشارات الصفراء، وتسدي ودانك..
وتلبسي في واحد مش مناسب..
أو انت..
اهلك يقولوا لك بص بتلبس عريان ازاي؟
بص اهلها! دول بيشربوا..
بس، ده سمعة ابوها مش تمام..
وانت تعمل اطرش وتعادي اهلك وتصمم تكمل..
ليه بيحصل طلاق..؟
فعلًا، الموضوع شاغلني..
ناس تقول، بعد سنين من الجواز،
ما شفتش معاه (او معاها) يوم حلو..
طيب اتجوزوا ازاي؟
كانت فيه اشارة المرور؟
من اجمل ما في اشارة المرور انها واضحة من فترة التعارف..
بتبان من حاجات صغيرة قوي..
من نظرات او نبرة صوت او استخدام مفردات..
او تلميحات او تحكمات..
او حب تملك.. او عند..
او بخل او عدم ثبات في التعامل..
واحنا؟
بنعمل نفسنا مش سامعين ولا شايفين..
علشان الدنيا تمشي..
والجوازة تتم..
وبعدها؟
بعدها يحصل ابغض الحلال..
بعد سنين من الخلاف والإختلاف والألم..
لو عايز تتجوز
ركز مع الإشارات..
ولو الإشارة صفراء خد وقتك..
وادعي ربنا يهديك..
وينور لك..
هل بعد الأصفر تتحرك ولا تقف خالص..
هل الأصفر بعده اخضر.. ولا بعد احمر
واوعي تقف مع اشارة خضراء..
واوعي تمشي مع اشارة حمراء..
ده جواز..
يعني مش لعبة ولا فسحة..
ولو متجوز فعلًا..
لو في اشارة صفراء
اقعد واتكلم.. واتناقش واسعى للإصلاح..
لو فيه امل، خلي الأصفر اخضر..
لله وبالإستعانة بالله…
ياللا… لاحظ الإشارات وتوكل على الله..
بعاداتي باصمم حياتي
سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها
