هل الضعف قوة؟

الضعف قمة القوة..

تيجي ازاي دي؟

قوة الراجل في قوته، 

وقوة المرأة في ضعفها..

قوة الراجل في ثباته الإنفعالي، 

في قدرته على التفكير وقت الأزمات..

في قوته مش بس قوة العضلات..

لأ، في قوته الفكرية والشخصية..

والست؟

الست قوتها في استيعابها انها اضعف من الراجل..

وان دي حاجة ما تعبهاش..

ان دي حاجة ربنا خلقها بيها وفيها،

لأنها لها دور تؤديه في الحياة والدور ده بيستقيم لما تعمله وهي متمسكة بهويتها..

رسولنا الكريم عليه الصلاة وسلام وصف الستات بالقوارير..

يعني حاجة رقيقة.. ضعيفة..

محتاجة معاملة برفق، معاملة خاصة..

هل ده اللي احا شايفنه حاليًا؟

للأسف مجتمعنا بقى فيه اضطراب هوية..

بعض الستات رافضين طبيعتهم اللي ربنا خلقها بيها..

ومشمرين وبيقولوا بلا رجالة بلا وكسة،

هما فين الرجالة دول، دول انقرضوا..

نفس ذات الستات، بيدعوا ان بناتهم تتجوز، 

وبيضغطوا على بناتهم انهم يلحقوا قطر الزواج..

حتى لو بأي عريس وخلاص..

زي اللي طالع بشخصيتين في فيلم…

شخصية بتكون يهدهم الرجالة..

وشخصية بتقول عايزة اجوز بناتي..

والبنات واقفة تتفرج ومش عارفة تكره الرجالة ولا تتجوز..

وستات تانية؟

ستات تانية اهلهم للأسف ربوهم يبقوا رجالة ورفضوا طبيعتهم..

عاشوا في بيت اهلهم بنات في شهادة الميلاد بس، 

بس مطلوب يشتغلوا بجد ويذاكروا بجد ويمشوا بجد وياكلوا بجد…

لحد ما بقت الخشونة جزء منهم، بيتصرفوا بيه بشكل تلقائي..

مرة من سنين طويلة كنت في تجمع مع مجموعة اصحاب ما قابلتهمش من سنين..

وكنا بنتكلم عن حياتنا ومسؤولياتنا وازاي مشغولين بطلبات الأولاد..

وواحدة من المجموعة سألتنا ليه مش بتخلوا ازواجكم يساعدوكم..؟

ضحكنا وردينا ان الرجالة مش بتساعد..

ردت قالت لا بيساعدوا…. جربوا بس تتدلعوا عليهم..

طبعًا احنا ضحكنا.. وهي كررت الكلام وقالت جربوا..

تطلبوا مش بلغة أمر..

جربوا لغة الرجاء.. بدلع..

طبعًا انا سمعت كلمة دلع وعقلي عمل Error 

دلع مين؟ دي كده يبقى خداع..

بعدها بفترة قرأت كتاب المريخ والزهرة..

ولاقيت فيه المؤلف جون جراي بيتكلم عن خصائص الراجل وخصائص الست..

وان الستات من خصائصهم اللي تخلي الرجالة يحسوا بروجلتهم هي الضعف

وان الرجالة من خصائصهم اللي تخلي الستات يحسوا بأنوثتهم هي القوة..

يعني الست بتحس بإنوثتها مع الراجل القوي..

والراجل بيحس برجولته مع الست الضعيفة..

واحنا فين كمجتمع..؟

ست مشمرة (سواء بإرادتها أو لأن الظروف اضطرتها)

ورافضة طبيعتها اللي واحد من خصائصها الضعف..

وراجل شايف راجل قدامه انما في البطاقة مكتوب جنب النوع "أنثى"

طيب يعمل ايه المجتمع ده؟

ينهار.. 

لكل ست.. ضعفك هو سلاحك وقوتك..

لكل راجل..قوتك هي مراية لرجولتك..

اوعى تتحول لست لأنك متجوز راجل..

والرجولة مش بالضرب ولا الصوت العالي ولا بالتحكم في اهل بيتك..

لو عايز تفهم الرجولة، ادرس سيرة حبيبنا عليه الصلاة والسلام..

ارجل من في الأرض..

واتجوز.. وخلف..

عليه الصلاة والسلام أفضل خلق الله..

من غير ضرب ولا عنف ولا تقريع ولا لوم..

من غير ممارسة عنف تحت مسمى الرجولة..

الرجولة حماية الضعيف واحتوائه وتمكينه..

مش قهره وارهابه..

خليكي ست قوية بضعفك..

خليك راجل بالقوة الصح..

 #اتجوز؟_٣٣

#الزواج

#اﻷسرة

#المجتمع

#السنة