ازاي اكمل مع شخص واحد حياتي كلها؟!

في بداية  تعارفي على زوجي العزيز قال لي انه مش بيحب اكلة الكِشك..

حكى لي ازاي وهو طفل كان بيحب الكِشك جدًا.. 

وفضل يوم ياكل منه لحد ما جاله تشبع وبقى مش بيحبه خالص..

ومن يومها بطل تمامًا ياكل كِشك..

طبيعي..

شئ طبيعي بالنسبة لطبيعة الإنسان..

لو بتحب المانجو او الشيكولاتة او السينما..

لو فضلت تاكل نفس النوع، نفس الطعم بالضبط، تتفرج على نفس الفيلم..

بعد كام مرة هتزهق.. هينتابك الملل…

دي طبيعتنا كبشر..

ما بالك بقى بالزواج..

تخيل تفضل عايش مع نفس الشخص، لمدة سنين..

ونفس الشخص بس.. مطلوب منك تكون مُخلص لها..

وتفضل من ساعة الزواج لنهاية العمر معاها..

(لو هي مش موافقة على إنك تكون متعدد الزوجات)

تعمل ايه؟

ازاي ست تاخد قرار انها تفضل مع نفس الراجل من الزواج للمات؟

لو طبيعتنا كلنا هو الملل من التكرار مع الوقت؟

السر في مفهومين مهمين قوي اسمهم التجديد والتطور…

المفهوم الأول مرتبط بعوامل خارجية..

مثلًا التجديد في الأكل، في الخروجات، في السفريات..

في الأنشطة اللي بنمارسها، في الأماكن اللي بنزورها..

في البلاد اللي بنروحها، او المطاعم اللي بناكل فيها..

في عفش البيت او حتى ترتيبه، في لون الحيطان..

في خلطة السلطة او وصفة البامية..

المهم يكون فيه تجديد..

وده.. على الزوجة المصرية الأصيلة تقوم بيه.. بأغلبه..

لأن الراجل (طبعًا بتكلم عن الراجل اللي فاهم مفهوم القوامة وبيصرف على البيت)

الراجل اللي بيصرف مشغول بتوفير المال الحلال..

وهنا الست الشاطرة الأصيلة، تدور على عوامل  خارجية تحققها بيها مفهوم التجديد والتوع..

زي ما شويكار عملت مع فؤاد المهندس في نهاية فيلم مطار الحب..

كان عايز التنوع، والفيلم وضح احتايج الراجل للتجديد والتنوع.. 

أما المفهوم التاني فهو التطور.. وده مرتبط بعوامل داخلية..

مثلًا التجديد في محتوى الكتب اللي بقرأها، المهارات اللي بنميها، الأفكار اللي بتبناها…

تطور فكري، اجتماعي، ذهني، عقلي..

ماهو اكيد لما اتجوزت سنة ١٩٩٧ كنت حاجة ودلوقتي سنة ٢٠٢٥ بقت نسخة تانية..

فيه ثوابت زي ما هي، زي الأخلاق والقيم العليا..

انما طريقة التفكير بتتطور، والنظرة للحياة بتتبلور.. 

وبالتالي الزوجين كل حد فيهم بيحصل له تطور في شخصيته وافكاره ورغباته ومشاعره وسلوكياته وعاداته..

المهم هنا ان التطور

يكون تطور مش تأخر.. يعني يكون للأحسن

انه يكون متوافق مع قيم واخلاق ومعتقدات الطرف اللي بيتطور

انه يكون متناسب مع الزوج/الطرف الأخر

والا التطور هيخلي الزوجين يفترقوا بدل ما يكملوا مع بعض..

ايه علاقة ده بسلسلة "اتجوز..؟" 

سؤال من احد القراء وصلني..

عن ازاي ما يحصلش فتور وملل في العلاقة بعد الجواز..

عجبني جدًا السؤال، الحرص على ان العلاقة تفضل كويسة بعد الزواج..

مفتاحين مهمين قوي

مفتاح العوامل الخارجية ومفتاح العوامل الداخلية..

اهم ما في المفتاحين انهم يكونوا مناسبين للزوجين..

هيجمعوهم ويخلوا العلاقة اقوى مش ابعد ولا افتر..

على مدار السنين زوجي وانا بفضل الله تشاركنا حاجات كتير..

مها دروس تدبر قرآن ومنها تطوع لخدمة المجتمع..

ومنها اعمال فنية وانشطة ترفيهية..

احتاجت منا تخطيط واستثمار مادي ووقت ومجهود..

زي اي حاجة في الدنيا عايزين نشوف ثمارها..

وعلى مدار السنين قرأنا واتعلمنا في مجالات مختلفة في الحياة..

واتناقشنا وتبادلنا الأفكار واتفقنا في مساحات مشتركة كتير 

واحتفظ كل حد فينا بوجهة نظره في مساحات صغيرة..

احترم فيها كل حد حرية التاني في التفكير..

العلاقة الزوجية هي البيت..

لو مر عليه الزمن بدون تنظيف وتجديد وصيانة واهتمام هيتهالك..

ولو تم الإستثمار فيه بحب وجهد من القلب وبنية لله هيتحول لجنة الله على الأرض..

ياللا نستثمر صح.. وبنية لله عز وجل

#اتجوز؟_٣٠

#الزواج

#اﻷسرة

#المجتمع

#السنة