هل من المنطقي يحصل ده في الجواز؟

هل منطقي نصرف كل الصرف ده في ليلة؟

هل منطقي ندفع رقم كبير كده في فستان يتلبس مرة واحدة؟

هل منطقي نجيب ورد طبيعي وندفع فيه فلوس وهو كام يوم وهيدبل ويترمي؟

محور مهم قوي في سلسلة "اتجوز" هو المنطق..

المنطق نص المحور، والمشاعر النص التاني..

لأن الجواز له طرفين، راجل طبيعته بيفكر بالمنطق

وست طبيعتها بتفكر في المشاعر..

في سنة ١٩٩٧ اتعرفت على زوجي العزيز..

اتخطبنا..

جاء يوم ياخدني من بيت اهلى علشان نخرج

فتحت الباب لاقتيه ماسك بوكيه ورد كبير..

راشش عليه من البرفان بتاعته..

وعلى وشه ابتسامة عريضة..

الورد فعلًا بعد كام يوم دبل واترمى..

انما الذكرى.. من سنة ٩٧ لسه محفورة في ذاكرتي..

لسه متسجلة في قلبي..

ولسه بتحرك مشاعري..

لسه فاكرة ابتسامته ولامعة عينه..

ليه الرجالة مش عايزة تتجوز..

أو اللي اتجوزوا كتير منهم مش سعداء..؟

لأنهم بيفكروا بالمنطق وعايزين الست أنثى انما تفكر بالمنطق

وتقبل المنطق وتعيش بيه..

يعني زرعة محتاجة ترويها مشاعر علشان تزهر،

تقوم ترويها منطق وتتضايق منها انها تحولت الى صبار..

طيب مش حبة منطق ونشوف الزرعة دي اتحولت لصبار ليه؟

صحيح مش منطقي ندفع رقم كبير في ليلة..

انما لو افتكرنا ان البنت اللي بتتجوز بتكون دي بالنسبة لها "ليلة العمر"..

وتخلينا ان الليلة دي بالنسبة لها الذكرى بتاعتها هتفضل معاها لسنين..

وقسمنا مصاريف الليلة دي على السنين، يمكن نلاقي انه منطقي فعلًا..

ونقيس على كده الفستان او شهر العسل او السفرية او الورد..

مواقف كتير لسه فاكراها لزوجي العزيز..

موبايل هدية كان نفسي فيه جدًا اول ما الموبايلات طلعت..

ما طلبتش منه يجيبه لأنه كان غالي وقتها..

وهو فاجئني بيه.. وكان سعره مش منطقي..

انما، وبعد اكتر من عشرين سنة، لسه موقفه ده بيحرك مشاعر حب وامتنان وتقدير واحترام له..

الست مننا، البنت، الأنثى، محتاجة راجل يخرج كل فترة عن المنطق،

علشان يرويها بمشاعر.. لأن ده احتياجها..

والأهم، الإبتسامة اللي على وشه، الكلمة اللي بيقولها وهو بيرويها..

"علشان بحبك".. أو "علشان اشوفك مبسوطة".. او "نفسي اسعدك"...

فرق كبير بين اجيب بوكيه غالي واقدمه بدون تعبير عن مشاعر..

أو اجيب بوكيه اصغر واقدمه بكلمة حلوة وابتسامة ولامعة عين..

طيب والراجل؟

الراجل بتاع واحد زائد واحد..

بتاع منطق..

ولأن الجواز فيه طرفين،

محتاجة الست كمان ترويه بالمنطق..

يعني تسمع.. وتفكر..

تختار.. تساعد..

اه مش منطقي عمل فرح وندفع فيه كل المبلغ ده..

تعالى نكتب كل البنود ونلغي حاجة ونقلل حاجة ونبسط حاجة انما كله الا الحاجة دي..

دي اللي هتفرق معايا قوي ونفسي فيها..

منطق..

ايوه مش منطقي نسافر بكل المبلغ ده..

طلبت من اخويا يساعدني اعمل بحث ولاقيت شركة ارخص وعرض احسن

وكمان شامل الأكل..

منطق..

خطوات تاخدها الست، البنت، الأنثي، تحسس الراجل إنها برضه

"كائن يعقل ويفكر وحاسس بيه"..

ما هو مش تور يتحلب ولا متجوز اباجورة..

في سنة من السنين كنا بنتناقش في اجازة عيد..

هنعمل فيها ايه..

وزوجي قال انه مش عايز يسافر في حتة..

وطلب مني اختار حاجة اعملها بدون سفر..

فكرت واخترت اننا نروح النادي…

نفرش في جنينة الجولف ونعمل Picnic

ونلعب لعبة..

اخترت حاجة بسيطة.. سهلة عليه..

وتملا مشاعري..

ليه؟

علشان اخلي طلبي منطقي..

لحد مرهق ومش عايز يعمل مجهود كبير في فترة معينة..

وحصل ايه؟

الولاد قالوا ان ده كان احلى يوم في الأجازة..

من بساطته.. ولأن زوجي شاف طلبي منطقي..

وانا اخترت حاجة منطقية وتملا مشاعري..

سعادة ورضا وحب..

يا ترى انت المنطق موقفك عن الزواج؟

ويا ترى انتِ المشاعر موقفاكي عن الجواز؟

يا ترى متجوز وبتروي شريكة حياتك منطق بس..؟

يا ترى متزوجة وبتفكري في مشاعرك والحرمان بس..؟

ياللا نفهم بعض..

ياللا نروي بعض بلغة اسمها

"احتياجات كل طرف وفقًا لطبيعته"

طبيعة الراجل منطق..

طبيعة الست مشاعر…

#اتجوز؟_٢٦

#الزواج

#اﻷسرة

#المجتمع

#السنة