سبب غافلين عنه وراء زيادة نسبة الطلاق

سبب غافلين عنه وراء زيادة نسبة الطلاق..

سؤال استوقفني وانا بفكر في الفرق بين مدرستي زمان والمدارس دلوقتي..

بالذات طبعا المدارس الخاصة واللغات والدولية..

زمان وانا في مدرسة الراهبات كان عندنا حصة اسمها 

Cours de vie

حصة حياة، بنتعلم فيها لضم الابرة والطبيخ..

ما كنتش بحب الحصة دي خالص، إنما كانت عندنا في الجدول وكان لازم نحضرها..

كانت حصص موجهة مخصوص "للبنات"..

حمايا العزيز كان بيحكي لي ازاي في مدرسته، مدرسة "البنين"، 

كان عنده حصص نجارة بيتعلموا فيها بأدوات حقيقة وبيطلعوا منتجات خشبية..

كنت بقرأ في كتاب عن العلاقة بين الزوجين،

وفقرة فيه كانت بتتكلم عن الخصائص المختلفة لكل حد فيهم 

وإزاي ان الراجل بطبيعته problem solver 

يعني بيفكر في حلول للمشاكل والتحديات،

وان ممارسته للتفكير ده بتفرز عنده هرمون الذكورة..

زي ما حمايا كان بيعمل في حصص النجارة..

وإزاي ان الست بطبيعتها nurturer

يعني بتروي أسرتها بحب وحنان، دي فطرتها..

وان ممارستها للرعاية بحب وحنان بتفرز عندها هرمون الأنوثة..

زي ما كان فيه سعي لتعليمنا حصص تدبير منزلي..

وقفت مع الفقرة وانتبهت..

النظم التعليمية الحالية اللغات والدولية، 

وبالرغم من ان الأهل بيدفعوا فيها مبالغ كبيرة، 

إلا أنها متأخرة في استيعاب الفرق بين الولد والبنت..

المدارس بقت مختلطة والبنت والولد في فصل واحد وبيدرسوا نفس المناهج، 

مطلوب منهم ينموا نفس المهارات، مفيش أي تعليم متخصص موجه للولد وطبيعته ولا للبنت وفطرتها..

بنات وولاد بيدخلوا المدرسة ويقعدوا من حضانة لثانوى مع بعض..

اكتر من ١٢ سنة شايفين بعض إنهم ند لبعض في الفصل..بينهم تنافس مين يطلع الأول.. مين اشطر..

والبنت بتتعلم تنمي مهارات التفكير وحل المشكلات وحتى الفن والرسم بقى محتاج تحليل وأبحاث..

وتتحول البنت لكائن حائر بين الاتنين 

لا هي بنت بفطرتها ومارست أنشطة مناسبة لها..

ولا هي راجل بطبيعته اللي ربنا خلقه عليها…

العلم فعلا والتقدم، طبيعي انه يؤدي لتقدم المجتمعات والشعوب..

لو قارنا بين عدد المدارس الخاصة واللغات والدولية دلوقتي وبين عددها من ٥٠ سنة هنلاقي ايه؟

طيب هل عدد المدارس دي أدى إلى تقدم المجتمع؟ 

التعليم في الصغر كالنقش على الحجر،

أتمنى من كل مربي فاضل جوا جدران المدرسة ينتبه 

لأهمية معاملة البنات كبنات وأنه يديهم مساحة للتعبير 

عن طبيعتهم من خلال أنشطة مناسبة للبنات  

واتمنى من القائمين على العملية التعليمية 

- تقديم أنشطة متنوعة منها مناسب للبنات بس ومنها مناسب للولاد

 بس لغرس الفكر ده عند الأطفال ان كل حد له طبيعة مختلفة 

- 

- إدراج جزء في المنهج عن يعني ايه بنت ويعني ايه ولد وخصائص كل حد فيهم

 وإزاي عليهم التكامل في المجتمع ويعاملوا بعض ازاي بطريقة تحترم الاختلافات بينهم

- الموازنة بين تنمية المهارات عند البنات وعند الولاد.. مهارات الولاد تكون أكثر لتنمية الفص الشمال من المخ المسؤول عن المنطق ومهارات البنات تكون اكثر لتنمية الفص اليمين من المخ المسؤول عن الإبداع 

خلينا نفوق وننتبه..

الطفل عامل زي الزرعة..

بيفضل يتروي في المدرسة لسنين..

بيدخل المدرسة ويطلع منها بأفكار ومعتقدات وسلوكيات بتشكل حياته بعد كده..

مهم قوي نرويه بشكل يخليه يتحول لزوج او زوجة صالحة.. مستوعب الفرق بين الاتنين ومدرك دور كل حد فيهم في منظومة الأسرة

#اتجوز؟_٢٥

#الزواج

#اﻷسرة

#المجتمع

#السنة