ست بمية راجل

ظلم كبير وقع عليا وعلى بنات كتير زيي..

من أهلنا وبدون قصد، بدون وعي، ويمكن بنية طيبة..

إنما للأسف النية الطيبة مش كفاية..

مهم كمان إن العمل تكون النتيجة بتاعته طيبة..

أبويا الله يرحمه وإحنا صغيرين كان بيشد عليا..

أنا وأخواتي البنات اللي اكبر مني، لأنه خلف بنات بس..

كان عنده توقعات عالية جدًا مننا، وعايزنا نعتمد على نفسنا..

لسه فاكرة مشهد لأخواتي والعربية عطلانة على الطريق الصحراوي مرة واحنا مسافرين..

واخواتي بيفضوا شنطة العربية، وبيطلعوا الاستبن وبيغيروا الكاوتش اللي فرقع..

ووالدي واقف بيشرب سجارة وبيتفرج عليهم..

كنت طفلة وهما كانوا لسه في المدرسة..

ولسه سامعة صوته وهو مرة بيعلمني اخرم الحيطة بالشنيور..

والشنيور كان تقيل وانا طفلة.. وهو بيقول بصوت عالي،

انشفي، اجمدي، أنا ما خلفتش رجالة عايزكم تطلعوا رجالة..

طبعًا ممكن حد يتخيل إنها جملة عابرة..

إنما للأسف كتير من كلام الأهل بيدخل على عقلنا ويترسخ..

ويتحول إلى معتقد ويفرز سلوك..

وبالتالي نبدأ نتصرف على أساسه..

ايه علاقة ده بسلسلة "اتجوز..؟"

علاقته ان فيه بنات كتير زيي..

أهلها، وبنية صافية، ربوها إنها تبقى قوية، معتمدة على نفسها..

انها تبقى ست ب١٠٠ راجل..

والنتيجة؟

إنها مع الجواز بيحصل صراع..

الزواج مهم جدًا فيه استيعاب إن الراجل له القوامة..

طيب ولما بنت بتتجوز وهي اتربت انها تبقى ب ١٠٠ راجل..

مين هيكون له القوامة في البيت..؟

بيوت كتير فيها المشكلة دي..

راجل ومراته بيتناطحوا..

هو شايف انه راجل وكلمته تمشي..

وهي شايفة اني زيي زيك..

لأ..

احنا مكملين لبعض، مش زي بعض..

الشمس والقمر بيطلعوا في السما، الشمس مختلفة عن القمر

في الدور والخصائص والطبيعة والتأثير..

رسالتي النهارده لكل أفراد الأسرة..

الاب، ارجوك ربي بنتك انها "بنت"..

الأم، فهمي بنتك انها "بنت"، مختلفة عن اخوها.. 

وان رسولها عليه الصلاة والسلام وصى عليها ووصف البنات ب"القوارير"..

البنت محتاجة تتعلم تبقى Interdependent 

مش Independent 

يعني تتكامل مع غيرها في أدواره، مش تستقل بأدوارها..

(غير الراجل اللي لأنه راجل وبسبب هرمونات الذكورة عنده بيحتاج يكون Independent)

يعني ابوها يقول لها تعالي نعمل مع بعض كذا.. تقدري "تعتمدي عليا" في كذا وأنت اعملي كذا..

فتشوف ان الراجل هي "محتاجة له" وتقدر "تعتمد عليه"..

و؟

واخوها اللي قاعد في البيت وهي بتعمل له سندوتشات وبتلم وراه؟

لأ..هو محتاج يتعلم انه يبقى Independent 

ولو هو عايز حد يدلعه تبقى أمه تدلعه مش اخته 

وكمان محتاج يتدرب إنه يبقى Interdependent

مع أخته وأمه..

علشان في المستقبل مع زوجته يكملها.. وتقدر تعتمد عليه..

كلام غريب؟؟

الصراحة الدنيا بقت عك تمامًا..

رجالة كتير للأسف شافت الستات مشمرة أكمامها وقايمة بتشتغل، 

فيتحول الراجل لراجل اعتمادي.. وينزل من نظر مراته..

وستات شايفة الراجل اعتمادي، فتتحول لست مستقلة وتطلب الطلاق..

وتقول ضل الحيطة احسن..

وعيال واقفة بتتفرج على بيت الأب والأم فيه بيلعبوا أدوارهم بعشوائية 

وبالتالي يكرهوا الجواز بسبب النموذج اللي شايفينه...

ونفضل نلف في دايرة مفرغة.. بين الست اللي غلطانة، لأ الراجل اللي غلطان..

الشاعر بيقول "الأم مدرسة إذا أعددتها أعددت شعبًا طيب الأعراق."

أعددتها إنها تكون ست، بنت.. مش راجل من جوا في شكل ست من بره وعندها اضطراب هوية..

انت يا ست الكل.. اعملي وقفة واسألي هل أنا بتصرف ك"راجل"..

دي مش شطارة، ده اضطراب هوية.. 

وافتكري ان مفيش راجل سوي عايز يتجوز ست بتتصرف كراجل..

وأنت يا سيد الناس.. اعمل وقفة واسأل هل أنا بتصرف ك"راجل" 

ولا أنا عايش حمادة عزو في نفسي؟

الأسرة نواة المجتمع..

لو أصلحنا الأسرة بإذن الله ينصلح المجتمع..

وأول نقطة في إصلاح الإسرة هي راجل مستوعب ان له القوامة..

وست مستوعبة انها ست ومرحبة ومستمتعة بالقوامة.. في ضل راجل بجد..

#اتجوز؟_٢٤

#الزواج

#اﻷسرة

#المجتمع

#ألسنة