الجواز ما بين العند والإنصهار

٣ جوازات في دوايري شفت بدايتهم ونهايتهم

شفت اهل بينصحوا العروسة (او العريس) ان بلاش الإختيار ده

ان الشخص ده مش مناسب

لأن عيلته مش مناسبة

لأن العيلتين مش من مستوى متقارب

لأن تربية كل حد من الطرفين مختلفة قوي عن التاني

لأن ثقافة العيلة دي مختلفة عن ثقافة العيلة دي

لأن عادات وتقاليد العيلة دي، مختلفة قوي عن عادات وتقاليد العيلة دي

وفي كل جوازة من التلاتة، العرسان تحدوا الأهل، وعندوا،

سدوا ودانهم وصمموا يتجوزوا

حتى مع اعتراض الأهل وعدم مباركنهم للجوازة

حتى مع الRed flags اللي طلعت في فترة الخطوبة

(يعني اللمبات الحمراء اللي بتقول انتبه فيه حاجة مش تمام)

وللأسف النتيجة زيجات فاشلة

منها اللي وصل لطلاق واطفال مشتتة بين بيتين

ومنها اللي مكمل على الورق وعامل زي الفترينة الزجاج

مظهر قدام الناس بس، انما لا يمت بصلة للجواز اللي هو سكن ومودة ورحمة

من فترة كن بتكلم مع بنتي عن موضوع الزواج

وضمن الكلام قالت لي ان من ضمن معايير الزوج اللي ترتبط بيه

انه يكون انا وباباها مبسطوين بيه

قالت لي، مش بس موافقين عليه، لا مبسوطين بيه

قالت لي انتم بتحبوني، وعايزين مصلحتي، واكيد خبرتكم في الحياة اكبر مني

كلامها استوقفني

وحسيت بالإمتنان

ان فيه ثقة بينا.. ان واصل لها ان اختيارات الأهل نابعة من الحب.. من الحرص

الأهل، اغلبهم، ده الدافع بتاعهم

صحيح فيه اهل عندهم بعض التقاليد اللي لسه متمسكين بيها

(زي زواج الأقارب مثلًا وغيره)

انما في العموم، الأهل لما بيقولوا على جوازة لأ.. ولأ اكتر من مرة،

اعتقد بيكون من عدم الحكمة (او من العند او الغباء) ان نسد ودان وما نسمعش

على الأقل نفكر ونتفكر في كلامهم

نفكر بيقولوا ايه وليه

نفكر قد ايه كلامهم ده موزون

للاسف الأفلام والمسلسلات شوهت افكار اجيال

ان عادي محمود ياسين تجوز فاتن حمامة اللي بيتشتغل عنده في البيت

طيب الزواج يعني عيلتين بينصهروا في بعض

ينصهروا ازاي بدون تقارب ثقافي واجتماعي وتعليمي وفكري؟

شباب كتير متخيلة ان الجواز عريس وعروسة

وبس

ومع شوية عند يقولوا مش عازين حاجة من حد

احنا هنعتمد على نفسنا

طيب ولادكم؟ المستقبليين؟

مش عايزن حاجة من خالاتهم واعمامهم؟

مش عايزن حاجة من جدودهم؟

من وجهة نظري من اكبر انواع الظلم اللي الإنسان يرتكبه في الحياة

هو اختيار شريك حياة مش ملائم

بيظلم ولاده، بيظلم اهله

بيظلم شريكه وبيظلم نفسه

بيظلم العيلتين

لو عايز تتجوز وسع العدسة بتاعتك وفكر في العيلة

لو عايزة تتجوزي اسمعي اهلك لما بيقولوا لأ بيقولوا لأ على ايه

وفكري في كلامهم من باب السعي للفهم مش من باب التمسك بالعند

ابويا الله يرحمه لما زوجي اتقدم لي، ما سألهوش بيشتغل فين ولا بيقبض كام ولا شقته فين وا اي حاجة..

واتفق معاه على ميعاد قراءة الفاتحة

وقال له: "كفاية انك من عيلة…"

بس كده

الجواز، "صهر"..

عيلة وعيلة بينصهروا

ويطلعوا عيال بتحب تروح بيت العم وبين الخالة لأنهم شبه بعض

لأنهم قريبين من بعض

مش الفرق بينهم سنين ضوئية

#اتجوز؟_٢١

#الزواج

#اﻷسرة

#المجتمع

#السنة