الجواز ما بين العقل والقلب

حوار دار بيني وبين واحد من ولاد اخواتي

عن الجواز

وفي نهاية الحوار قال لي:" علشان كده أنا شايف إن في الجواز العقل يجي الأول، وبعد ما العقل يدي التمام نسيب المساحة لمشاعرنا.."

جملة خلتني اراجع المعتقدات اللي اترسخت عندنا/عند كتير مننا

ان الجواز بالقلب.. وان العقل لما يقول لأ او يعترض يكون غلطان

الوساده الخالية.. حبيبي دائمًا

افلام الرومانسية اللي تشبعنا بيها واحنا اطفال..

اللي صورت إن العقل والقلب مستحيل يتفقوا

اللي صورت ان الست اللي تختار بعقلها هتعيش تعيسة

وان اللي هيختار بقلبه معناها انه تجاهل عقله

جملة خلتني احس بالفخر بإبن اختي

انه، وهو لسه شاب، وصل للوعي والنضج ده

واتصرف على اساسه

وجملة خلتني افكر ازاي اصلًا قبل العقل حتى بيكون فيه حاجة اسمها "قبول"..

ان الإنسان يحس بقبول الطرف الأخر

وبعدين يعدي مواصفات، ظروف، عادات، سلوكيات الطرف الأخر على عقله

ويسأل: هل الشخص ده تمام؟ 

مش تمام دلوقتي في اللحظة الراهنة دي بس

تمام بصفة عامة

يعني ممكن تلاقي شخص تمام بالنسبة لك لأنه بيشتغل كذا وبيقبض كذا

طيب ولو ساب الشغل، هل هيفضل تمام؟

ممكن تلاقي شخص رياضي وصحته تمام

طيب لو اكتشفتي انه عنده مرض مناعي أو مرض وراثي، أو مرض خطير، تمام؟

العقل دوره انه يفلتر ويختار وفقًا للجوهر

للأخلاق، للقيم، للتربية، للسلوكيات

والعقل بيحتاج مدخلات علشان يقرر

يعني يشوف + يسمع من الطرف الأخر حاجات تخليه يكمل في العلاقة او يجري منها..

طب والقلب؟

القلب احيانًا كتير بيدور على الحب من أجل الحب.. 

يعني تلاقي واحدة بتحب على نفسها..

واحد عايز يتحب ويحب، بغض النظر عن مين الطرف..

القلب عايز يحب.. عايز يسمع كلمتين حلوين.. 

عايز يجري على البحر زي منى واحمد..

عايز بوكيه ورد على شمعة في خروجة..

او كارت وعليه قلوب..

بيحصل ايه لما بنختار بالقلب بس..؟

بنختار الكلمتين والجرية على البحر والبوكيه والشمعة..

شوية تصرفات رومانسية حالمة، اتقدمت في افلام كتير..

بيفضل الراجل يعملها بالكتير اول سنة بعد الجواز…

وبعدها؟ 

وبعدها بخ.. انسي.. 

وبعدها بيفضل الجوهر الحقيقي..

بيفضل منظومة القيم والأخلاق اللي اتجوزناها..

بعد الجواز بمدة قي ايه؟

باسابيع.. او شهور…

بيركز الراجل/الزوج على توفير لقيمة العيش..

على الشغل.. لأن دي اكتر حاجة بيحس فيها برجولته..

والست؟ 

تلاقي نفسها مسؤولة عن بيت وغسيل وطلبات واكل ومشتروات و…

وهو؟ مشغول في الشغل..

وتحصل الصدمة..

فين اللي اتجوزته بقلبي؟

اللي فاضل هو اللي عقلك شايفه..

هل معنى ده اننا نلغي القلب؟

ابن اختي قال"نسيب المساحة لمشاعرنا.." 

كل حد فينا يشوف مساحة قي ايه

قد ملعب كورة.. ولا قد الكوكب

المهم يكون القعل ادى التمام

وانا بتكلم مع بنتي في موضوع الزواج، اتكلمت معاها على اهمية ان البنت تتجوز حد بتحبه فعلًا..

شرحت لها ازاي الحياة الزوجية بتمر بمراحل مختلفة

وازاي بيحصل احياًنا خلافات، في وجهات النظر، في الأولويات، في الإختيارات..

اللي بيخلي الست تستحمل وتكمل وهي داخليًا مصرة انها تنجح الجوازة 

هو القلب.. 

تنجح الجوازة طبعًا يعني بيت يكون فيه سكن ومودة ورحمة

مش بيت على الورق وفيه زوجين اعداء

ان قلبها بيحب

كتير ازواج بيمثلوا مسرحية هزلية ساخرة قدام الناس

انهم تمام.. وان الزيجة تمام…

والواقع انه الحب مش موجود.. ولا حتى السكون ولا المودة ولا الرحمة

علشان كده العقل بس مش كفاية

ولا القلب بس كفاية

الاتنين اساسين في الجواز

انما بالدور

عقل زي عسكري المرور

يدي اشارة خضراء

وبعدها نفتح شبابيك قلبنا ونسوق بمنتهى

الحب،

واحنا وجهتنا واضحة

جوازة ناجحة

#اتجوز؟_٢٠

#الزواج

#اﻷسرة

#المجتمع

#السنة