السبب اللي بيطفش الرجالة

ايه اللي بيخلي الراجل يطفش؟

الراجل المتجوز، وغير المتجوز..؟

ايه اللي يخلي راجل يطفش بعد ما اتجوز؟

بعد ما خطب واتجوز، واسس بيت وصرف،

دفع مهر وشبكة ويمكن فرح..

وساهم في حاجات في البيت..

ايه اللي بيخليه يطفش بعد ما اتجوز؟

واللي لسه ماتجوزش، ايه اللي بيخليه يطفش وهو لسه في مرحلة الخطوبة 

او حتى يطفش انه يفكر اصلًا في مشروع الجواز؟

"عدم التقدير"..احساسه بعدم التقدير..

أحد الأسباب الجوهرية اللي بتخلي الراجل يزهق ويطفش..

وفقًا للخواجة جون جراى، صاحب مدرسة الرجال من المريخ والنساء من الزهرة،

الراجل محتاج "حاجات" جوهرية:

١- يحس ان الست "محتاجة له"، انه ذكر قوي وهي انثى محتاجة راجل اقوى منها 

(مش قوة بدنية بس، قوة في الفكر وفي الشخصية وفي اتخاذ القرارات..)

بيقول Men like to feel needed 

٢- يحس بالتقدير، راجل بيخرج ويشتغل ويجيب قرش ويشيل هم العيلة والمصاريف و..

عايز يحس بالتقدير منها.. بالاهتمام بطلباته، بكلمة حلوة، بطبخة طعمة لو بيحب الأكل..

To feel appreciated 

٣- بيحب يلاقي "مراته سعيدة"، بعد سعييه في الشغل وتوفير متطلبات الحياة..

بيكون عايز يرجع البيت لست سعيدة.. وقتها بيفكر يسعدها اكتر..

Men like to make happy women happier

٤- بيحب مراته تتغافل عن أخطائه الصغيرة وتتجاهلها وما تقفش على الواحدة 

أسلوب الأمهات بتاع نور الأوضة اطفيه، رجع طبقك، البس شبشب..الكلام ده مش للأزواج..

بالتالي هو عايز كلام شكر ومديح مش نقد ولوم…

ايه علاقة الكلام ده بسلسلة مقالات اتجوز؟

اولًا كل شخص أقدم على الزواج، كان متخيل ان "احنا مختلفين يا نوال، مش هنكون زي الناس دي اللي بتشتكي من الجواز.."

وبعدين؟ وبعدين يسعى في الشغل، منال تزعل انه مش موجود، تضرب بوز، يرجع من الشغل يلاقي بوزها شبرين، تتخانق معاه على الشراب اللي سابه على الأرض، يحس بعدم التقدير..يلاقيها غيرت اللمبة ووقفت مع السباك، يحس انه متجوز راجل وانها مش محتاجة له.. ويبدأ سلسال الخناقات والخلافات.. وبعدها "يطفش"..

ومين بيتفرج؟ الأبناء..

ويلاقي ابوه وامه بيتعاركوا.. والبيت مشحون.. والأم متنكدة، ومنكدة على أبوه وعليه وعلى اخواته..

وابوه متنكد.. وشقيان وزهق.. ويمكن قرر يبطل يشتغل اصلًا لانه حاسس انه متاخد For granted 

ده اللي شايفه، يفكر يتجوز ازاي؟

ويروح عند اصحابه يلاقي نفس السيناريو في بيوت اهلهم...

والست؟ 

الست عايزة ورد يا ابراهيم..زي ما كانت هند صبري بتقول لجوزها في فيلم أحلى الأوقات..

عايز حضن.. زي برضه ما قالت في الفيلم..

الست عايزة:

١- تتشاف.. يعني لما تقص شعرها يقول لها ايه القصة الحلوة دي (حتى لو مش عجباه)

ولما تلبس حلو يقول لها ايه الشياكة دي..ولما تخس يقول لها ايه الرشاقة دي..

وطبعًا ده معناه انه فعلًا يبصلها.. لأن ستات كتير أزواجها مش بيبصوا فعلًا عليها وبيبصوا بره كمان!

٢- تتسمع.. يعني يسمعها لما تفضفض بدون إعطاء نصايح.. 

لأن الست لما بتفضفض هي نفسها بتلاقي حلول… يسمع بس بدون دروس ومواعظ..

حتى لو بتشتكي مع العيال واللمبة والسباك (طالما مش شكوى منه هو فعليه يسمع ويستحمل)

٣- رومانسية.. كلمة حلوة على طبطبة، على حضن على ورد..او هدية او شوكولاتة بتحبها..

لأن كده بالنسبة لها هو بيفكر فيها و"مهتم بيها"..

٤- كلام حلو.. زي تسلم ايديكي الأكل حلو جدًا.. يا خبر تعبتي النهارده مع الولاد ربنا يخليكي لنا..

كتير من الستات مش لاقية ده..وبالتالي تعيسة.. ونفضل نلف في دايرة، 

هو مستني انها تبقى سعيدة وتقدره علشان يسعدها اكتر، وهي مستنية كلمة حلوة علشان تبقى سعيدة..

ومع طول الإنتظار ست بتهمل في نفسها.. وتبدأ تحس بالحرمان العاطفي.. 

وراجل يطفش من البيت ويحس بعدم التقدير..

وجيل بيدفع التمن.. جيل مش لاقي البيت مكان آمن سعيد يحب يرجع له يرتاح فيه..

جيل البنات بتفكر تجمد بويضات، والرجالة منهم اللي بيفضل الزنا عن الزواج..

طيب ايه الحل؟

انت يا ست الكل، افهمي نفسية الراجل وتعاملي معاه بلغته..

انت يا ست الناس عبري عن احتياجاتك..

بس الأول قدري اللي معاكي، وانزلي تحت جناحه وتغافلي عن اخطاؤه واسعدي نفسك..

وانت يا ابو العيال..

العيال كبرت.. وشرب السجاير وقعدتك بره البيت وعلى السوشيال ميديا والتصابي وازمة منتصف العمر واهمالك لمراتك افرزت جيل مش عايز يتجوز..

هتقبل ابنك يجيب ابن من الحرام؟ ولا رميت طوبته ومش عايز أحفاد؟

ولا مستنيه يكرر تجربة غير ناجحة؟

الأسرة هي نواة المجتمع.. ومع زيادة نسبة الطلاق ونسبة العنوسة، تفتكروا المجتمع بتاعنا رايح لفين؟

مع كمان دس بساطة الزنا والمساكنة وانهم عادي من خلال الإعلام.. 

رايحين على فين؟

أفيقوا يرحمكم الله.. 

#اتجوز؟_١٩

#الزواج

#اﻷسرة

#المجتمع

#السنة