فرح آم العريس

العبرة بالنهايات..

كام مرة حضرنا افراح وبعد كام سنة سمعنا ان العرسان اتطلقوا؟

كام مرة شفنا زوجين زي السمنة على العسل وبعدها سمعنا انه خانها مع واحدة تانية؟

مرات كتير.. مش في الدراما، لأ في الواقع..

علشان كده مهم اننا نتابع والنهايات ونشوف النهايات الناجحة والسعيدة بدأت ازاي..

المرة دي، في السلسلة دي من المقالات بعنوان "اتجوز.."، 

هشارك معاكم خواطري عن مشهد النهاية..

في مسلسل سابع جار، حبيت اشوف نهاية المسلسل ايه، علشان افهم هو المسلسل "بيدعو لإيه"..

يمكن يكون فعلًا هدفه نبيل..

مشهد النهاية كان صادم!

بنت دلال عبد العزيز المتدينة اللي المسلسل طول الوقت بيصورها انها حادة وبخيلة ومتزمتة..

يوم خطوبتها ومامت العريس مصممة يكون فيه اغاني ورقص..وانها تحط مكياج (اللي هو شئ شخصي جدًا)

والعروسة، بسبب التزامها رافضة ترقص يومها..وبتقول مش بحط مكياج.. مش عايزة..

العريس بيدخل يقول لها انه بيحبها كده.. وان يا ريت لو تلايمها شوية علشان والدته، بس لو مش عايزة تمام..

وانه مش عايز يزعل امه.. وان حتى لو الخطوبة ما تمتش اليوم ده بسبب رفضها للأغاني والرقص، هو هيرجع تاني يخطبها لأنه بيحبها..

كلام جميل، من راجل اختار ومستوعب ان عروسته مختلفة عن امه،

ومدبها مساحتها وحريتها في الإعتقاد والتصرف..

طيب والأم..

هنا كانت الصدمة..

امها بتعيط وتزعق وتقول لها "لايميها وعدي الليلة" واعملي اللي حماتك عايزاه!!

بتقول لأمها "دي قناعاتي يا ماما ومش مستعدة اغيرها"

وامها بتفضل تعيط وتضغط عليها..

فبتقوم العروسة، وتخرج من اوضتها وترقص على الأغاني.. وهي حاطة مكياج

المشهد كان صدمة بالنسبة لي!

أم بتطلب من بنتها تتصرف عكس معتقداتها ومبادئها عشان "تعدي الليلة"؟

الخطوبة مرحلة تعارف علشان نتجوز واحنا فاهمين بعض شوية وفاهمين عيلة كل حد منا..

لو من اول يوم الخطوبة، العروسة مطلوب منها تعدي الليلة، تقضي عمرها في الجوازة ازاي؟

كل يوم هتقول لنفسها "لايميها وعدي الليلة"

وام العريس اللي بترغم العروسة انها تسمع اغاني وترقص علشان ام العريس عايزة "تفرح"..

هتعمل ايه في العروسة بعد الجواز؟ هترغمها تعمل ايه ولا ايه بدعوى انها "تفرح"..

وازاي العريس يقول لها بحبك زي ما انت.. وهرجع لك لو مش عايزة تقومي ترقصي النهارده، 

فهي اللي بتقرر تقوم ترقص.. ضد قناعاتها..

المشهد ده محتاجين نراجعه الف مرة واحنا بنتجوز او وحد من ولادنا بيتجوز..

مهم جدًا ان يكون فيه تكافؤ بين الطرفين وتوافق فكري/اخلاقي/ديني..

هو نفسه العريس بيقول لها انه انسان عادي، بيصلي ساعات وساعات لأ..

وهي ملتزمة جدًا.. والطبيعي انها كانت تبقى عايزة حد منتظم في الصلاة..

ايه علاقة ده ب"اتجوز..؟"

١- اوعي تسمعي كلام امك و"تلايميها وتعدي الليلة" لما يتطلب منك حاجة "ضد قناعاتك" انت، انت اللي هتتجوزي مش هي

(دي مش حاجة صغيرة وليلة وهتعدي، ده موقف محوري"

٢- اوعى توافقي على عريس علشان "تعدي الليلة" وامك تبطل عياط  وام العريس تفرح..

٣- ام العريس اللي تضغط عليكي في الخطوبة وتخليكي تعملي حاجة ضد ارادتك جرس انذار بيقول لك فيه قطر هيجي يدهسك، فاطلعي اجري

٤- ارجعي اقرأي المقالة بتاعتي اللي اتكلمت فيها عن المعايير بتاعت الزوج، واسألي نفسك ايه المعايير اللي مفيهاش نقاش.. لو انت ملتزمة ومتشددة زي شخصية المسلسل، اوعي تقبلي بواحد بيصلي سطر ويسيب سطر..

٥- انت محتاج تفكر فعلًا انت عايز ايه.. عايز زوجة ملتزمة وبتغير قناعتها عشان تعدي الليلة وترضي والدتك؟ ولا بتحبها زي ما هي كده؟

٦- انت كأم ارجوكي اتقي الله واوعي ترغمي بنتك تعدي الليلة مهما كان سنها ومهما كانت اتخبط قبلها كام مرة..

الزواج من حد مختلف عن قناعات بنتك نهايته يا حياة تعيسة يا طلاق.. والخسران الطرفين مع الأحفاد لو وصلوا انهم يخلفوا..

من اكبر الحفر في موضوع الزواج هي محاولة كل طرف انه يغير التاني..

عريس ياخد واحدة بتحب تلبس عريان ويطلب منها تتحجب بعد الجواز..

عروسة تتجوز واحد بيشرب خمرة وتطلب منه يبطل بعد الجواز..

قبل الجواز، مهم قوي كل حد يقعد مع نفسه ويفكر ايه هي قناعاتي، ايه هي اخلاقي، ايه هي اولوياتي..؟

ويتفق مع نفسه انه عمره ما يعدي ليلة مع حد يخليك يتخلى عن قناعاته بالضغط وبدعوى ان حد تاني "يفرح"

النهايات السعيدة محتاجة بدايات حكيمة.. بدون ضغط ولا صعبانيات..

#اتجوز؟_١٨

#الزواج

#اﻷسرة

#المجتمع

#السنة