آفة الأزواج اللي بيتغيروا بعد الزواج

مرة واحدة قريبتي كانت بتستشير زوجي في شاب معجب بيها..

(زوجي كوتش معتمد في العلاقات من مدرسة المريخ والزهرة وخبير في العلاقات)

زوجي طلب منها تحكي له عن الشاب..

وهي بتحكي، حكيت له ازاي الشاب كان عنده امتحان 

وأنه حكى لها انه كان مش مذاكر ودخل غش في الإمتحان علشان ينجح..

اول ما زوجي العزيز سمع كده نصحها تقطع علاقتها بالشاب..

ولما سألته ليه..

شرح لها موضوع محوري في الزواج..

موضوع متعلق بالقيم والأخلاق..

شرح لها ازاي ان الناس بأخلاقهم مستويات..

فيه اللي هيجتهد وينجح.. او يتفوق..

وفيه اللي مش هيغش حتى لو هيسقط..

وفيه اللي مش هيغش بس ممكن يوافق يغشش غيره (ايًا كانت الأسباب)

وفيه اللي هيغش في الخفاء وهو مكسوف من غشه..

وفيه اللي بيباهى بالغش وبيحكي انه غش..

وده اسوأ الأنواع..

كلام زوجي فكرني بمرحلة مرينا بيها..

مرحلة هو فيها اتغير.. في اهتماماته، في عاداته، في طريقة تفكيره..

وقتها اتهمته بإنه اتغير.. وان مش هو ده الشخص اللي اتجوزته..

وهو سمعني وقتها، وفعلًا أكد على كلامي، انه اتغير..

شرح لي الفرق بين التطور والتغيير..

وإن طبيعي الراجل اللي اتجوزته وهو في منتصف العشرينات، 

طريقة تفكيره واهتماماته وعاداته ونظام حياته يتغيروا وهو في مراحل عمرية مختلفة..

واتكلم معايا في القيم والأخلاق..

وازاي هي اللي المهم تفضل ثابتة عند الإنسان..

منظومته الأخلاقية..

يعني هو محترم، مجتهد، مخلص، أمين، صادق..

وهيفضل كده.. 

وان لو ده اتغير وقتها يبقى ليا حق ازعل..

الكلام ده كان من سنين طويلة.. يمكن قرب العشرين سنة..

لما قريبتي طلبت منه النصيحة في الشاب،

افتكرت الكلام ده.. 

وازاي الغشاش في امتحان، ممكن يخون مراته وممكن يغش في الخامات وممكن ينقل شغل حد تاني..

ايه علاقة ده ب"سلسلة اتجوز..؟" ؟

علاقته:

١

- مهم جدًا واحنا بنختار نركز في القيم والأخلاق.. واللي بتبان في تصرفات وسلوكيات وكلام الطرف الأخر..

٢- مهم اننا ننتبه للأسرة اللي نشأ فيها، لأن منظومة الأخلاق بتتشكل في السنين الأولى من الطفولة.. فمهم أعرف أسرته ومدرسته كانوا بيغرسوا ايه

والنقطة الخطيرة جدًا هي

٣

- اني ارحب بالتطور في الفكر مع مرور الزمن.. مش اتخانق او اختلف او انفصل عن الطرف الأخر لأنه اتغير.. طالما القيم والأخلاق واحدة او ثابتة

٤- اني انا كمان اتطور.. علشان اواكب الطرف الأخر ونكون مع بعض على نفس المستوى..الفكري، الحضاري، الثقافي..

من سنين زوجي العزيز اتعلم قيادة موتوسيكلات..

وطلب مني اروح اتعلم أنا كمان.. 

وقتها في الأول رفضت.. انتابني خوف شديد..

ازاي اسوق موتوسيكل في وسط المرور والزحام؟

وهو طلب مني اني اجرب.. واثق فيه..

سألني هل عمري عرضتك للخطر؟ 

هل طلبت منك مجازفة عرضتك للخطر؟

ثقي فيا.. واتعلمي..

اخدت شوية وقت افكر، وبعدها قررت اتعلم.. اتطور..

اتخطى خوفي واتحلى بالشجاعة والمرونة..

واجرب..

وفعلًا اتعملت وبدأت اسوق في نطاق مناسب ليا..

وبدأت اسافر معاه بالموتوسيكل..

ومر الوقت وتوقف هو عن سواقة الموتوسيكلات وانا كمان توقفت.. 

لما بفكر في المرحلة دي،

كان ممكن المرحلة دي تفرقنا..

لو اتهمته بالتغيير والإنشغال وانه بقى له دايرة اصحاب انا براها 

وكمان مش متواجد زي الأول بسبب السفريات..

انما لأنه طلب مني اني اتحرك واتطور معاه علشان "نفضل قريبين"، 

قررت اخد الخطوة دي..

لو عايز تتجوز، اختار القيم المتفقة مع قيمك..

سواء كانت احترام او استقلالية او حرية او تعاون او كرم او مرح..

ولو عايزة تتجوزي خلي عندك المرونة انك تتطوري..

ما تفضليش تكبري في العمر وعايشة في جمود فكري وبتتهمي شريك الحياة انه اتغير..

ولو انت او انتي متجوزة فعلًا ياللا مهم قوي نعمل وقفات دورية ونسأل

هل في علاقتنا بندي لبعض مساحات ان كل حد فينا يتطور؟

و

"هل احنا قريبين؟" بنتطور مع بعض؟

ولو لأ، 

محتاجين نتطور ازاي وفي ايه علشان نكون مع بعض على مستوى متقا

رب في الفكر، في الحياة، في العلم، في الرياضة.. 

#اتجوز؟_١٧

#الزواج

#اﻷسرة

#المجتمع

#السنة