سر حب الرجالة في البنات المهملة في نفسها

"نفسي اعرف عاجبهم فيها ايه؟ الا ولا لابسة حاجة عدلة ولا مسرحة شعرها.. مهملة جدًا في نفسها، عاجبهم فيها ايه؟"

 

كنت بتناقش مع اختي في مسلسل سابع جار، وجات سيرة مي، اللي عايشة في شقة لوحدها..

 

خلال حلقات المسلسل "الإجتماعي" اللي ناس كتير (للأسف) شايفة انه شبهنا..

هبة (اللي برضه مهملة في نفسها ويا نايمة يا بتشرب سجاير، ومش بتعمل مجهود في اي شغل) 

بتفضل تتردد على شقة مي، وبتتعرف على صاحب مي.. 

وبعد شوية بتبدأ تروح له شقته.. وبعد كام زيارة له، بتشرب عنده بيره.. 

ومش بتعجبها، بس بتكمل شرب فيها...

 

واخر المسلسل، مي بتفضل تتحايل على هبة انها تنزل الشقة تقابل صاحبهم… 

وبالإلحاح، هبة بتنزل.. وبتفضل مستنية انه ينطق، ولما بيقول لها بحبك وهي خلاص هتمشي، بتحضنه..

وبيطلب منها حضن كمان علشان يحضر معاها خطوبة اختها..

ما هذا؟ ما هذا العفن الإجتماعي؟

 

المشهد ده حرق دمي في المسلسل..

وخلاني افكر في أبعاد مختلفة:

١- نفس مكان مي في الفجور والزنا، بيحصل فيه استدراج لهبة وبتبدأ بكلام عادي مع الشاب وبعدها حضن.. علشان كده ربنا قال لا تقربوا../لا تتبعوا خطوات الشيطان..

 

٢- الصاحب ساحب، واحدة بتزني بدافع "الحب" وبتعمل اجهاض.. ونفس االواحدة بتشجع جارتها انها تنزل لراجل في البيت علشان تضغط عليه انه يقول لها بحبك

 

٣- كلمة "بحبك"، يعني ايه؟ يعني هوصلك الشغل واديكي الحرية (اللي هبة كانت طالباها) انك تشتغلي وافضل باقي اليوم فاشل وعاطل وقاعد في البيت كسول خملان مش بشتغل؟

 

٤- هبة منتظرة ايه من راجل عرفته في بيته قاعد على الكنبة ولا شغلة ولا مشغلة، عجبها فيه ايه؟ انه هيديها "حرية"؟

 

٥- تطور العلاقة دي هيكون ازاي؟ او بمعنى اصح، ازاي هيختلف عن علاقة مي بجارها؟ علاقة بين ٢ غير مسؤولين..ادت لخيانة زوجة وزنا وحمل سفاح واجهاض..

 

في سلسلة "اتجوز…؟" تطرقت لموضوعات مختلفة..

النهارده حديثي موجه للطرفين..

 

للراجل:

يعني ايه بتحب واحدة؟

يعني تشربها بيرة وتشرب معاها سجارة وتحضنها؟ وشوية شوية تزني معاها؟

هو ده الحب؟

 

يعني تفضل قاعد في بيتكم تتفرج على التليفزيون ومش بتعمل اي حاجة لها قيمة وبالكاد تروح توصلها لو عندها شغل؟

 

 

لما درست كوتشينج اتعملت اني محتاجة الأول احدد انا عايزة اروح فين، وبعدها اشوف انا واقفة فين، وازاي اتحرك من مكاني للمكان اللي عايزة اروحه..

 

هبة، طول الحلقات هي مش عارفة هي عايزة ايه، هي بس عايزة "تجرب"

 

للبنات:

عايزة تجربي ايه؟ حتى في التجربة محتاجة تسألي نفسك عايزة تجربي ايه وليه؟

وايه "حدودك".. ولا عايشة بلا حدود زي مي؟

 

الشيطان بيسهل لنا الحرام ويقول لنا عادي مش هتيجي من سجارة، مش من خروجة، مش من زيارة في البيت..

وواحدة واحدة نلاقي نفسنا هوب في طريق تعلق وادمان لحاجات حرام ومش عارفين نخرج منه..

 

الحل؟

انك تسألي نفسك ايه النقطة اللي عايزة توصلي لها…

لو هبة بس ركزت مي وصلت لفين بالزنا والإجهاض، 

لو كانت قضت سنين النوم لحد سن ال٢٦ في تعلم وتوعية وتنمية 

كانت مش هتبقى بتشحت حب من حد فاشل..

 

انك تبقى صادق مع نفسك وانت بتختار العلاقة اللي بتدخل فيها..

عايز واحدة تسيبك فاشل قاعد على الكنبة..؟

ولا عايز واحدة وجودها يخليك راجل، بيشتغل وبيجتهد وفي سعي انه يفتح بيت ويبني أسرة..

 

لكل راجل مرتبط بواحدة مهملة في نفسها زي مي وهبة..

ايه اللي مصبرك على اهمالها؟ انها مراية لك؟ ولا انها راضية بيك وبفشلك؟

 

لكل بنت مهملة في نفسها،

ليه ماشية مهملة؟ هل دي حرية؟

وتفتكري ليه راجل معجب بيكي وانت مهملة في نفسك؟

علشان هو متحضر؟ ولا علشان عارف انك مش بتقدري نفسك وانك بتعاملي نفسك برخص فهتقبلي معاملته الرخيصة..؟

 

خلاصة القول..

انت، قوم من على الكنبة انت راجل.. والراجل هرموناته الذكورية الشغل عامل محوري لتوازنها.. 

وانتي، اوعي تمشي ورا مي.. الا لو عايزة نفس نهايتها.. واوعي تشحتي كلمة بحبك من واحد فاشل.. 

ولما تعاملي نفسك بتقدير واهتمام ورعاية كأنثى، هتلاقي اللي يشوفك انِثي جوهرة..

 

بلاش قلة قيمة..

وبلاش خلط ما بين العفاشة والكسل والحرية..

الحرية بجد مسؤولية زي

لبنى عبد العزيز ما علمتنا..

 

#اتجوز؟_١٥

#الزواج

#اﻷسرة

#المجتمع

#السنة

بعاداتي باصمم حياتي

سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها