الرجالة زي الهم على القلب

"يا شيخة كده احسن، بلا هم، الحاجة الحلوة في الجواز هي اننا نجيب عيال.. وجودهم بقى قلته احسن.."

حوار حدث بالفعل بيني وبين واحدة من دايرة معارفي.. 

كانت بتحكي ان بنتها اتقدم لها عريس دكتور..

 

شاركتها ازاي رفضت اتجوز دكتور لأنه بيكون غايب اغلب الوقت بسبب العيادة والمرضى، 

زي ما كان ابويا مش متواجد معانا واحنا صغيرين، وكانت امي شايلة حمل تربيتنا تقريبًا لوحدها..

وازاي أني كنت عايزة زوج يشاركني تربية الأولاد.. كنت عايزة شريك حياة..

 

كلامها يومها صدمني، 

التفكير ان الأحسن ان الزوج يكون غايب اغلب الوقت وان الغرض من الزواج بس هو الإنجاب 

كان كلام موحش بالنسبة لي…

 

لما بدأت اتفرج على مسلسل سابع جار، لاقيت نفس الفكرة، 

هالة اللي بتدور على تلقيح علشان تنجب..علشان نفسها في طفل..

من غير ما تفكر في الإبن اللي هيجي الدنيا هيعيش ازاي وهيحس بإيه ويطلع بعقد نفسية قد ايه..

 

قمة في الأنانية، انها تفكر تشبع احتياجها كأم من غير التفكير في الكائن الحي اللي هيجي الدنيا..

من غير تفكير في القانون الإلهي إن الطفل محتاج أب وأم..

وإن ربنا بيقول في كتابه العزيز "وقل رب ارحمهما كما ربياني صغيرا"، 

يعني الأب له دور محوري في التربية..

مش خزنة ولا مصدر تلقيح بويضة وبس..

 

فكرت في هالة وفي انانيتها..

وافتكرت مقولة كنت قرأتها من سنين 

كانت بتقول ان احسن هدية يقدمها الأب لأبنائه هو انه يحب أمهم..

بس يحب أمهم ازاي؟

لو هي اصلًا شايفة انه "هم" وان وجوده "قلته احسن"؟

 

طبعًا مش بعمم، إنما للأسف لما بقابل ستات متجوزة بحكم شغلي، كتير منهم حصرت دورها في دور الأم..

ولما بتتكلم عن جوزها، بيكون أما انه طفل هو كمان، وبالتالي بتلعب معاه دور الأم،

او انه ماكينة، مشغول في شغله ومهملها.. وان اللي بينهم علاقة فاترة، او اصلًا مفيش علاقة..

 

في سطوري من وقت ما بدأت أكتب سلسلة "اتجوز..؟" وأنا بتكلم عن النية والهدف من الزواج..

وعن أهميته للنهوض بالمجتمع والتصدي للزنا والمساكنة 

والأفكار الغربية المهلكة اللي بقيت بتتردد بكثرة بهدف اننا نعتادها ونقبلها..

 

فكرت في هالة وكلام الست المعرفة عن ان وجود الراجل هم..

فكرت في الهدف..الهدف من الجواز..

لو الهدف بس اني اخلف، ومش حاطة في اعتباري خالص اننا نكون سكن ومودة ورحمة لبعض.. 

يبقى ليه اتجوز اصلًا؟ ما أروح اكفل طفل يتيم.. أو لقيط.. 

او اسعد جيراني واخواتي في ولادهم..

او اشتغل في حضانة او مدرسة..

او اتطوع في دار ايتام..

 

ليه اجيب طفل يعاني..بسبب غياب الأب والعلاقة الفاترة بين أهله 

ويكبر وهو شايف نموذج مشوه ويتخيل ان ده الصح او العادي؟

 

كلامي النهارده للزوجة.. للست..

اهم دور نلعبه لما نتجوز هو دور الزوجة..

وبعد الإنجاب دور الزوجة بالإضافة لدور الأم.. 

مش الأم بس.. ولا الأم ثم الزوجة.. 

 

طيب هو ايه دور الزوجة؟

رعاية بس؟ يعني تأكل وتشرب وتقرع؟

ايه دور الزوجة؟

 

مرة والدي الله يرحمه كان بيكلمني عن دور الزوجة..

قال لي الراجل بيحتاج مراته تبقى صديقته، وحبيبته وعشيقته وامه وام ولاده..

طبعًا انا يومها كنت بسمع الكلام ده على استحياء من والدي..

 

وبعد سنين من الزواج افتكرت كلامه.. ولاقيته ما قالش خدامته ولا طباخته ولا غسالته…

طبعًا فيه ناس هتقول ما دي ادوار الأم .. الخدمة والطبيخ والغسيل..

 

لأ.. الأم هي "الحنان".. ده اهم دور للأم.. تحن، تحتوي، تطبطب، تستوعب، تحضن.. 

طيب هتختلف معايا..

فكر كده، اللي امه بتتوفى بيفضل ياكل ويشرب وبيلاقي اللي يغسل هدومه ويقضي طلباته،

انما حنان امه؟ مات معاها..

 

بالتالي، الزوجة منا محتاجة تلعب أدوار مختلفة،مع الزوج.. 

ومنها دور الأم مش اللي بتنتقد ولا بتعاقب ولا بتوبخ..

ده دور الناظرة..او العسكري..

 

ولما تلعب دورها كزوجة زي ما والدي قال لي هتلاقي زوج وجوده مش هم وقلته مش احسن..

هتلاقي زوج شايفها خير متاع الدنيا..

وهيكون لها حبيب وصديق قبل ما يكون زوج او مصدر تلقيح لأطفال..

 

لكل بنت بتفكر تتجوز..

من فضلك راجعي تفسك.. وفكري في كلام والدي، هل مستعدة تلعبي الأدوار دي؟

وكل زوجة نفسها تعيش حياة طيبة، 

من فضلك راجعي نفسك وشوفي بتلعبي ادوار ايه مع جوزك، وهدفك اي ونيتك ايه..

 

وافتكري ان البيت السعيد بإذن الله يطلع عيال سوية..

يعني لو فعلًا بتحبي ولادك، حبي ابوهم يحبك يبقى بيتك سعيد وحياتكم طيبة وولادكم بإذن الله سوية..

 

الزوج الصالح م

ش هم.. والرجالة اللي بجد قلتهم مش احسن..

 

 

#اتجوز؟_١٤

#الزواج

#اﻷسرة

#المجتمع

#السنة

 

بعاداتي باصمم حياتي

سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها