السم في العسل وعدم الزواج

 

"احنا الإتنين ناضجيين.. ونعرف نختار..

وانا عايز يكون بنا علاقة مريحة وحلوة"

 

اول ما سمعت الجملة دي حسيت ان دمي بيفور..

جملة على لسان علي في مسلسل سابع جار..

بيقولها لهالة..

اللي رافضة الجواز.. 

 

سمعت الجملة وروحت فتحت المصحف ادور على قول الله تعالى "﴿ وَلَا تَقْرَبُوا الزِّنَا ۖ إِنَّهُ كَانَ فَاحِشَةً وَسَاءَ سَبِيلًا﴾ [ سورة الإسراء: 32]

 

فكرت ان ربنا عز وجل بيقول "إنه كان فاحشة وساء سبيلا"..

والمسلسل اللي ملايين الشباب والمراهقين.. البنات والرةالة بيتفرجوا عليه..

وجملة عابرة بتتقال.. 

وجمل كتير في المسلسل بتشتتم في الرجالة والجواز..

وبتوري البنات صايعة ومنحلة ومنحرفة..

او متزمتة وباردة وقاسية..

مسلسل من ٦٧ حلقة.. عمال يخرب في العقول..

 

استوقفني رد فعل هالة.. لما علي طلب منها علاقة مريحة وحلوة..

طالما هما الإتنين مش عايزين يتجوزوا..

استوقفني انها زعلت..

مع انها هي مش عايزة تتجوز..

ورايحة له في شقته..

وقبلها بتخرج معاه وبتشرب خمرة..

منتظرة منه ايه؟

يعرض عليها يحجوا مع بعض؟

 

ربنا سبحانه وتعالي في قوله الكريم بيقول "ولا تقربوا"..

يعني مش الفعل.. الإقتراب من الفعل..

خروجة لوحدنا.. خروجة فيها شرب.. زيارة في بيت..

ركوب عربية لوحدنا.. 

 

طبعًا فيه ماس مش هيعجبها كلامي.. 

وهتشوف اني رجعية..

انما هرجع واقول الغلط على اللي بيتفرج وسايب الإعلام يغسل عقله ويشوه فكره..

 

وانا في كلية الإعلام كان عندنا مادة عن النقد..

والدكتورة خلتنا نحلل فيلم..

وعلمتنا واحنا لسه في سن ال١٩ ازاي ننتبه للسم اللي محطوط في العسل..

وازاي لما نتفرج على حاجة نتفرج بوعي وحضور..

ونقرأ الرسايل الخفية المدسوسة في الأعمال ال"فنية"..

 

الفن اعزائي القراء، الفن الحقيقي الصح، دوره انه يرتقي بالمجتمع.. وينهض بيه..

فن له رسالة..

مش فن يغرس سموم في عقولنا..

 

طيب ايه رسالتي النهارده عن موضوع الجواز؟

١- اننا نقلل شوية التعرض الإعلامي اللي هدفه هدم المجتمع 

٢- اننا نختار بندخل عقولنا ايه لما نيجي نتفرج على حاجة 

٣- اننا ننتبه للسموم المدسوسة في الأعمال "الفنية"

٤- اننا نوقف التعميم ونستوعب ان دي اعمال درامية.. يعني الهدف منها "دراما" علشان حضراتنا ننجذي ونقعد نتفرج..

٥- ان "الفن" ده بيعرض لنا في اغلب الأوقات نماذج مشوهة.. وكلها "دراما" لأن عقلنا بيتغذى على الدراما..

٦- ان مع الوقت بنبدأ نصدق ان ده الواقع من كتر التعرض له بدل ما نقوم نعمل حاجة مفيدة

٧- ان افكارنا ومعتقداتنا بتصدق العك ده وبالتالي عقلنا بيفضل يركز في الحياة على حاجات شبه النماذج دي علشان يتطمن ان افكاره صح.. 

٨- انه بيلغي اي نماذج مخالفة لأفكاره.. يعني لو شاف ٢ متجوزين وسعداء هيلغي الفكرة او هيفكر انا تمثيلية..

 

يا ترى احنا بنقرب من ايه؟

ربنا بحفظنا من الفواحش وسوء السبيل..

ويقربنا مما يحبه ويرضاه..

 

الزنا عمره ما يكون علاقة مريحة وحلوة.. الزنا فاحشة وساء سبيلا..



#اتجوز؟_١٣

#الزواج

#اﻷسرة

#المجتمع

#السنة

 

بعاداتي باصمم حياتي

سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها