GPS الجواز

هتتجوزي ازاي وانت اللي بيدور عليكي مصدق انك انقرضتي..؟

رجالة كتير متخيلة ان "الزوجة الصالحة" يعني البنت الصالحة انقرضت..

مش موجودة..

وانت؟

عايشة حياتك في دايرة صغيرة من اصحابك البنات..

من المسجد للدرس للخاتمة لدار الأيتام..

ودايرتك كلها ستات..

مش اي ستات..

ستات شبهك او ستات كبار في السن، دايرتهم صغيرة زيك.. عندهم فراغ وبيملوا وقتهم بالتطوع..

وانتي؟ 

منتظرة عريس ينزل من السما..

وانت محترمة ومتدينة.. انما رافضة جواز الصالونات..

طيب عايزة ايه يا ست الكل؟

عايزة تتجوزي ولا لأ..

لو عايزة حاجة عليكي السعي..

عليكي تحديد انت عايزة ايه؟

عليكي التفكير اللي انت عايزاه ده ممكن يكون متواجد فين..

وعليكي الدعاء..

مرة زوجي العزيز كان بيقدم ورشة عمل عن معايير اختيار شريك الحياة..

جزء منها كان عن موضوع السعي..

للعريس والعروسة..

يعني لو بتدوري على حد مثقف مش هتدوري في الملاهي..

هتروحي ندوات ثقافية، مكتبات.. معارض كتب، مؤتمرات..

ولو انت عايزة واحدة رياضية، مش هتدور في المسجد.. 

هتدور في النادي او الجيم او مسابقات الجري..

هتروحي الأماكن دي.. 

بهدف، انت تلاقي شريك الحياة المناسب.. بدعاء ان ربنا يرزقك بيه..

هتروحي بعد ما تكوني عملتي الواجب الأول وهو استبدال الخوف من الزواج بحماس لتكوين اسرة وتوكل على الله..

والواجب التاني وهو تحديد هوايات/اهتمامات الشخص اللي انت تتمني ترتبطي بيه..

فيه مقولة بتقول الحركة بركة..

هل انت في سعي؟ في حركة؟

اشتغلتي على انوثتك وطاقتك زي ما اتكلمت معاكي في مقالة سابقة؟

هل عملتي الواجب بتاعك بالتفكير في الجواز..؟

في معناه؟ في قدسيته؟ في تبعاته الإيجابية وضرايبه؟

هل فكرتي عايزة تتجوزي ليه؟

وازاي هتفضلي انت وزوجك قريبين وسعداء علي مر السنين؟

مرة قرأت مقولة كانت بتقول ان الأحلام بنعيشها مرتين،

مرة في خيالنا والمرة التانية على ارض الواقع..

هل بتحلمي؟ ولا شايفة الزواج كابوس؟

هنرجع تاني ونقول.. فيه رجالة خايفة من محكمة الأسرة..

ورجالة خايفة من الطلاق وتبعاته..

ورجالة شايفة انها تشتري عربية احسن مما تتجوز..

ورجالة بتقول هي فين الست الصالحة دي..؟

انت فين من كل ده..

عارفة ايه المشكلة..؟

انك مترددة.. 

عين في الجنة وعين في النار..

بتقولي بلا جواز بلا بتاع..

خليني حرة..

وصوت تاني بيقول لك طيب اتجوزي وهاتي طفل وبعدين اتطلقي..

وصوت بيقول لك لو اتجوزتي واتطلقتي هيحصل هيحصل ايه..؟

كل ده يجي تحت مسمى واحد اسمه التشوهات الفكرية..

حضرتك عندك قلق وخوف وممكن يوصل للوسواس بسبب النماذج اللي بتشوفيها..

وعارفة ايه كمان..

خايفة تقولي عايزة اتجوز واخلف وما يجيش ابن الحلال فتحبطي.. 

فتحرجي قدام اهلك وجيرانك واصحابك..

فبتقولي من الأول انك مش عايزة…

الحل ايه؟

لو انت فعلًا موضوع الجواز شاغل بالك

١- فكري جديًا عايزة تتجوزي ولا لأ.. بجد.. عايزة ولا لأ؟

٢- فكري عايزة تتجوزي ليه (واوعى تتجوزي بس علشان اتجيبي اطفال..)

٣- راجعي انوثتك وطاقتك..

٤- فكري العريس اللي نفسك فيه هواياته واهتمامته ايه وبيتواجد فين وروحي له في ارضه..

٥- جربي الهوايات او الأنشطة دي بنفسك..ادخلي العالم بتاعه..

٦- ادي انطباع صح عن نفسك.. ما تتظاهريش بالفضيلة وانت متحررة ولا بالتحرر وانت مقفلة..

٧- ادعي ربنا وانت مؤمنة ان امرك كله خير..

٨- افتكري ان الشيطان هو اللي بيلعب في دماغك ودماغ الرجالة..

لأنه هو الفايز مع كل جوازة مش بتتم.. وبسببها بيتحول المجتمع لدايرة مليانة معاصي ومحرمات..

وانت يا سيد الرجالة؟ عليك نفس المهمة..

فكر جديًا.. وادعي ربنا السميع الرزاق.. 

وافتكر ان فيه بنات صالحة كتير.. بس انت بتدور في مكان غلط.. 

او مستسهل انك تفكر في اللي قدامك وخلاص..

او مركز على النماذج اللي مش تمام علشان تهرب من الجواز..

زي ما اكل العيش بيحب الخفية..

ولكل مجتهد نصيب..

خفوا قدمكم.. واجتهدوا في علاقة مقدسة…

وعلى فكرة.. فيه ناس كتير متجوزة وعايشة في رضا..

بس مش بتقول علشان بتداري على شمعتها….

واخيراًا لو مش عايزة تتجوزي، الجواز مش فرض..

المهم تحسمي الأمر وتسعي بجد لو فعلًا عايزة..

#اتجوز؟_١٢

#الزواج

#اﻷسرة

#المجتمع

#السنة