بين النقاب واللبس الفاضح
هي فين الزوجة الصالحة دي؟
اتجوز؟ اشتري عربية احسن!
القوانين بقت مخلية الستات مستقوية.. نتجوز ازاي بالقوانين دي؟
روحت اطلب واحدة أمها منتقبة وأبوها ملتحي وأهلكوني بالطلبات المادية فمشيت وما رجعتش..
دي أمثلة من التعليقات اللي القراء الأعزاء شاركوها على مقالتي عن الجواز..
واللي بتعكس الوضع الحالي من الجمود والتشوه الفكري والخلل المجتمعي..
- البعض شايف ان مفيش ستات صالحة خلاص.. يعني انقرضوا وكل ستات الكون غير صالحة.. ومنهم امهم وأختهم وبنت خالتهم وجارتهم.. وده طبعا تشوه فكري اسمه التعميم
- البعض هو نفسه مش صالح وشايف الدنيا بايظة زيه، ولأنه بايظ او مش تمام متخيل ان كل الشعب مش تمام.. وده خلل فكري تاني..
- البعض متخيل ان الدين هو النقاب واللحية وطالما ام العروسة منتقبة وأبوها ملتحي تبقى عيلة صالحة، وده خلط مجتمعي لان اسر كتير بتلبس النقاب او الخمار او الحجاب وتربي اللحية من باب العادات والتقاليد مش من باب التدين.. وبنات اعرفها انقهرت انها تلبس الحجاب غصب عنها وانتهى بيها الحال لخلع الحجات والتطرف في اللبس العاري بسبب كبت العادات والتقاليد
- البعض شايف الجواز انه صرف فلوس وبالتالي ادفع الفلوس اني اشتري عربية اركبها بدل ما اتجوز ست وكأن الزوجة انحصرت في انها دابة مش انها زوجة وام ومربية ومدرسة وشريكة حياة ونص المجتمع
- البعض شايف ان لما الستات تقرر تقعد في بيتها بعد الجواز وتبطل تفكير في الشغل وتحقيق ذاتها يبقى يفكر يتجوز.. على أساس ان المدرسات والممرضات والدكاترة في كل التخصصات تبقى رجالة وهو صاحب الجمود الفكري هيبقى عادي معاه مراته يولدها راجل ويعالجها راجل وبنته (لو ما وأدهاش) هيعلمها راجل (ده برضه لو علمها ما هي مصيرها البيت فتتعلم ليه؟)
كم التعليقات والرسايل اللي بتوصلني بشكل مباشر واونلاين وبتطلب مني استمر في الكتابة عن الجواز مخلياني مليانة طاقة اني اكتب.. واكمل..
طيب النهارده كلمتي عن الجواز للطرفين..
- انت كعريس بطل تحصر التدين والصلاح في الزي بس.. في ناس كتير لابسة رداء التدين ومن جوا لا حول ولا قوة إلا بالله
بطل حكم بالمظاهر وبطل تحكم على تدين اسرتها بالنقاب والخمار واللحية
- انت كعروسة بطلي تلبسي لبس عاري فاضح وانت أصلا بتصلي وبتصومي وبتعاملي الناس باخلاق وقيم عليا
(فيه نماذج اعرفها بنات زي الفل انما طريقة لبسها وضحكها وهزارها بيدي إنطباع خطأ جدا وبالتالي بتبان صايعة وهي مش كده)
- العريس محتاج يشتغل انه يبقى صالح.. يعني يزكي نفسه.. ولما يزكي نفسه ويغير ما بنفسه ربنا هيغير حاله ويهديه للزوجة الصالحة
- العروسة.. محتاجة تفكري لنفسك.. بلاش عناد مع اهلك بلبس عاري فاضح ولا اتباع اهلك بدون فكر.. فكري لنفسك وخلي تصرفاتك ولبسك وطريقة هزارك وكلامك متماشية مع أخلاقك.. وبلاش كلام الأفلام بتاع هو اللي بيفهمني غلط وهو محتاج يقبلني زي ما أنا..
هو وهم كتبوا انهم مش لاقيين زوجات صالحة..
فكري ايه بتعمليه بيدي انطباع انما طالحة مش صالحة..
طبعا سؤالين من الاسئلة الوجودية بتدور في بالي من كام يوم
١- البنات اللي بتروح تصلي التراويح والتهجد وتعمل اطعام وتطوع دول بنات ايه لو مش بنات صالحة او بتسعى انها تكون صالحة؟ ليه ما راحتش كباريه وقعدت بشيشة وكاس وهي الاسم لابسة انما مش لابسة ؟ ليه اختارت تروح تتعبد؟
٢- ليه اللي شاغل تفكير الرجالة هو قانون الاسرة؟ ليه طاقة التفكير مستنفذة في قانون الأحوال الشخصية؟
زي اللي عمال يدرس الضرايب الجزافية والحبس عند الإفلاس وقاعد مع اصحابه يتكلموا عن ده علشان يفضلوا قاعدين على القهوة بدل ما يقوموا يفتحوا مشروع..
الطبيعي لو أنا عايز انجح فعلا اني ادرس ازاي انجح المشروع مش قوانين الإفلاس..
طيب مش عايز تتجوز ما تتجوزش
افتكر بس
- ان الجواز ده سنة رسولك عليه الصلاة والسلام
- النظام الطبيعي بتاع الكون لبقاء الحياة
- انه احتياج اساسي عندك زي ماسلو - ابو علم النفس - ما شرح في هرم الاحتياجات، زي المياه والهواء والاكل والنوم
- ان كبت احتياجاتك بياثر على نجاحك في مجال الشغل والرياضة وتوازنك النفسي وعلاقاتك
- ان البنين من زينة الحياة الدنيا
- ان خير متاع الدنيا الزوجة الصالحة
"إذا نظر إليها سرته، وإذا أمرها أطاعته، وإذا غاب عنها حفظته" صدق رسول الله عليه الصلاة والسلام
- ان الست لما بتتجوز بتشيل همك وهم عيالكم وعيلتكم..يعني انت مش بتخليها هانم لما بتتجوزها، انتم بتتشاركوا الشيلة..
يعني كفاية اتقوا الله
نسبة العنوسة بقت خطيرة..
وفيه رجالة مستسهلة الحرام..
وفيه اسر مطلعة عين البنات اللي سنها كبر..
وفيه بنات نفسها فعلا تتجوز وتخلف ويبقى عندها أسرة (مش بتحلم توصل لطلاق ومحكمة أسرة)
وفيه بنات كتير مستحرمة الحرام ومكبوتة وانت قادر تعفها وتفتح بيت وعايش مقضيها..
ما هذا الخلل المجتمعي؟
اتقوا الله..
#اتجوز؟_١١
#الزواج
#اﻷسرة
#المجتمع
#السن
بعاداتي باصمم حياتي
سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها
