اتجوز؟..يا كله يا بلاش!

اتجوز..؟ علشان اتجوز يا… يا بلاش!

يا عريس كامل يا بلاش..

يا الشقة تتفرش كلها، وكل الكهربائيات تيجي قيل الجواز، 

والفوط والملايات.. والصيني وكاسات الجيلي..

ونعمل فرح يكلفنا فلوس كتير..

نتباهى بيه قدام اللي نعرفه واللي ما نعرفهوش..

ونعمل Photo shoot ونلبس ونحط ماكياج بمبالغ كبيرة..

ونطلع كام يوم عسل..

يا بلاش..

العريس.. الكامل..

مفهوم مغلوط ومشوه

بيخلي العريس مش عايز يجي اصلًا..

لأنه مش كامل..

الكمال لله وحده..

ولأن ماله مش حرام (نتمنى كده)

ولأنه تعب في الفلوس دي..

ولأنك طالبة منه انه يكون كامل وهو لسه في بداية حياته..

فمش عايز يجي..

يجي يدفع كل ده ليه؟ في حاجات هو مش مقتنع انه يدفع فيها اصلًا..

او في حاجات هو مش شايف انها ضرورية دلوقتي..

من اكتر الجمل اللي بستغربها في الأفلام اللي بتشوه تفكيرنا..

لما اب يقول لعريس متقدم لبنته "هتعرف تعيشها في المستوى اللي انا معيشها فيه؟"

ايه التوقعات الخيالية دي؟

يعني ازاي نتوقع ان راجل في بداية حياته هيكون كامل..؟

او هيقدر يعيش واحدة في مستوى عالي من الأول..؟

حديثي النهارده مع كل عروسة بتدور على عريس

• يجهز لها الشقة من مجاميعه من قبل الجواز

• يعمل فرح بفلوس كتير قوي هو قعد سنين علشان يجمعها او هيتداين علشان يعمله

• يدفع في تفاصيل كتير علشان تنزل صور على السوشيال ميديا وتبان كوول ويمكن تبقى ترند..

اتقي الله..

• ابدأي معاه وواحدة واحدة كملوا الشقة وواحدة واحدة كملوا المتطلبات..

• فرقي بين الضروري اللي فعلًا مش نافع نتجوز من غيره وبين اللي ممكن يجي بعدين وبين اللي مش مهم يجي اصلًا 

• راجعي الطلبات اللي انت طالباها واسألي نفسك هل انت فعلًا عايزاها ولا اهلك او اصحابك بيقولوا لك ما يصحش ولازم والمفروض؟

• افتكري ان اللي اخدت القرد على ماله راح المال وقعد القرد.. فدايمًا اختاري الراجل الراجل.. والطلبات مع الوقت هتيجي..

•  

وقت ما زوجي اتقدم لي كانت شقته في مكان مش عاجبني.. بعيد جدًا عن اهلي وكل حاجة اعرفها..

وقتها قال لي :المهم احنا وعلاقتنا ببعض يا ايمان.. وكل حاجة (حاجة) ممكن نغيرها.. قدام ممكن نغير اللي مش عجبك.. 

وقدام غير لي اللي مش عاجبني.. لانه راجل قد كلمته.. 

يوم ما اتقدم لي والدي الله يرحمه ما سألهوش بيقبض كام ولا شقته مساحتها ايه ولا هيقدم شبكة ومهر ايه..

ولما امي سألته ازاي نقرأ الفاتحة من غير ما نتفق؟ قال لها "انا بشتري راجل"..

عايزة تتجوزي؟

اشتري راجل.. راجل يصونك وقد كلمته.. 

وكل حاجة مش موجودة دلوقتي ممكن مع الوقت بإذن الله تتوفر او تكتشفي انك مش عايزاها بجد..

عايز تتجوز..

اتجوز واحدة بتدور على راجل..

مش "ممول" يجهز لها شقة كاملة ويعمل لها فرح علشان تلبس فستان ابيض وتتصور وتسافر وهي مش مستعدة تستحمل معاه او تبني معاه واحدة واحدة..

كفاية بحث عن عريس كامل..

نعم للبحث عن راجل في سعي انه يبني اسرة..

#اتجوز؟_١٠

#الزواج

#الأسرة

#المجتمع

#السنة