الزواج وتاريخ الصلاحية

"أنا اتطلقت يا لمياء"..

نموذج من النماذج اللي بتعرضها لنا الدراما وبنصدقها كواقع هي

فشل الزيجات التانية….وفشل الزيجات في "السن الكبير"..

في مسلسل سابع جار ليلى اتجوزت قريبها، اللي وعدها يشيلها من على الأرض شيل..

وانه يعوضها عن زواجها الأول الفاشل..

وانتهى بيها الأمر للطلاق، لأن جوزها كان بيرغي طول الوقت..

ولأنه خلاها تتحول الى جليسة اطفال (له) وغسالة..

اتطلقت ورجعت علشان "تعيش براحتها"..

السم في العسل وتشويه الأفكار وهدم الأسرة ونشر الفجور بقت من الأهداف الواضحة والصريحة للدرما..

طبعاً تحت زي تنكري اسمه "الحرية والتحضر"

وللأسف، مع تخوف الرجالة من قوانين الأسرة..

ومغالاة الأسر في متطلبات الزواج..

وتخوف البنات من الزواج اللي زي البطيخة يا حمراء يا قرعة..

نسبة العنوسة زادت جدًا..

وبنات كتير وصلت لسن الأربعين واكبر بدون جواز..

ورجالة برضه..

فيجي المسلسل ويرسخ فكرة ان الزواج بيقتل الحرية

وإن الحمد لله ان الزوجة اتطلقت..

طيب بناتنا اللي في سن الأربعين تفكر ازاي تتجوز في يوم من الأيام؟

لما المسلسل بيعرض نموذج ليلى اللي بقت مش عارفة تتصل بأختها 

ولا تشوف حياتها ولا تعمل اي حاجة لأنها اتجوزت؟

ونموذج اختها لمياء اللي اخدت حريتها بعد ما جوزها مات..

لأنه برضه كان متحكم فيها..

يعني البنت اللي تشوف المسلسل ده هتفهم ان عندها اختيار،

يا تتجوز وتفقد حريتها، يا تعيش بلا زواج..

تجيب لنفسها وجع دماغ ليه؟

وطبعًا نفس الشئ للراجل.. 

ليه بعد سن الأربعين او الخمسين، يبلي نفسه بواحدة تسلبه حريته؟

الا لو هدفه انها تكون خدامة بلا اجر..

وانا مسافرة برشولنة احضر دورة عن الكتابة العلاجية، 

قابلت "Ken", راجل في السبعينات من عمره..

كانت المدربة اللي بتقدم الورشة امريكية..

في سن ال ٧٣..

حكت لنا ازاي، بعد تجارب متعددة لها وهي في سن اصغر، قابلت راجل وهي في سن ال ٦٩..

وبعد ما فضلوا يتقابلوا اكتر من سنة، قرروا يتجوزوا..

واتجوزت Ken وهي في سن السبعين.. 

اول زواج لها!

طبعًا القصة شدت انتباهنا كلنا، كل الحضور..

وواحدة من اللي بيحضروا معايا قالت لها أنا في سن ال٣٥ وكنت فاكرة انه فاتني القطر خلاص..انتي ادتيني امل كبير..

وقت الإستراحة ما بين الجلسات، Ken دخل قدامنا.. طبطب على المدربة وقال لها بصوت عالي انه فخور بيها وبالتأثير اللي هي بتعمله وان ما احوج العالم الآن لناس تشتغل في العلاج النفسي..

وبدأ يفرجها على صور اخدها لها بموبايله وهي بتشرح لنا وبتشتغل..

طبعًا الموضوع ابهرني..

روحت اخر اليوم سألته "ما خفتش من تقييد الحرية بالزواج في السن ده؟

رد قال لي انه كان متزوج قبل كده.. وكان زواج مؤلم.. استمر فيه لحد ما ولاده كبروا علشان نفسية ولاده..

وانه هو و Kay (المدربة) اتكلموا قبل الزواج واتناقشوا واتفقوا..

كل واحد شرح احتياجاته ايه وعايز ايه من الزواج..

نيته ايه وهدفه ايه وتوقعاته ايه واحتياجاته ايه..

وانهما الإتنين محترمين الإتفاق..

بقى لهم ٣ سنين متزوجين..

سافر وهو في السبعينات ٣٦ ساعة طيران علشان يبقى معاها وهي بتقدم ورشتها للسنة ال ٣٩ على التوالي..

وقف يصورها، اتعرف علينا كلنا وعلى الدول اللي جايين منها..

مع كل راحة بيجي يطبطب ويشجع..

ده اسمه ايه؟

طبعًا حد هيقول لي علشان هما اجانب..

طبعًا هرد واقول لك الأجانب عندهم مفهوم المساكنة عادي..

يعني وهما الإتنين في السبعينات كانوا ممكن يقرروا ما يتجوزوش..

وبالذات هو بعد تجربة زواج مؤلمة..

طيب ده اسمه ايه؟

اسمه حياة..

اسمه سكن ومودة ورحمة..

اسمه ارتباط مقدس..

اسمه عارف انك هتمرض وتتعب وقربت تموت..

لأن اللي جاي مش قد اللي راح،

وبالرغم من كده مستعد اخوض التجربة واكمل سنين عمري معاك..

في ونس.. مع شريك حياة..

ناكل ونشرب ونسافر ونتفرج..

نتشارك مع بعض..

لو انت لسه ما اتجوزتيش وبتقولي اتجوز ازاي بعد سن الأربعين..

لاحسن افقد حريتي.. افتكري النموذج ده..

وزييه كتير على فكرة وفي دوايري واعرفهم شخصيًا..

اتجوزوا في سن كبير.. سواء زواج اول او تاني..

وبفضل الله سعداء و متونسين عن وحشة الحياة لوحدك..

ولو انت كنت في زواج مؤلم او خايف ترتبط تاني..

خد مدة اتعرف فيها على الشخصية واتفقوا من الأول زي الناس الكبيرة العقلة..

الحياة في الحلال والونس تستحق اننا نبذل لها جهد..

مهما اتقدم بينا العمر.. سواء في الأربعين او الخمسين او الستين او حتى السبعين..

الزواج

مش دايمًا فقد حرية..

الزواج سكن ومودة ورحمة..

#اتجوز؟_١٦

#الزواج

#اﻷسرة

#المجتمع

#السنة