أساس المشاكل في الحياة الزوجية

"ما فيش فرق بين الراجل والست..احنا "زي" بعض.."
دي احد المقولات اللي بتضحكني..

فعلًا.. بحس ان اللي بيقولها أعمى أو أحمق..

الفرق واضح وضوح الشمس..
إنما فيه ناس بتحس بالتهديد من الإقرار ان فيه فرق، وفرق جوهري..

الراجل علشان يخلف بيحتاج يتجوز، يتزاوج..
والست، علشان تخلف بتحتاح تحمل، تشيل نطفة، بذرة..
وتفضل تكبر جواها لشهور.. وتاخد منها، من غذاها ومن كيانها..
لحد ما بعد شهور الزوجين يخلفوا..

كام حد فينا وقف عند الإختلاف الجوهري ده واتعلم منه عبرة للحياة..

الست بتحتاج وقت، تمهيد، تأهيل، واحدة واحدة..
بتحتاج إعداد واستعداد..
إعداد نفسي، وبدني ومادي..
بتحتاج وقت..

والراجل؟
مش عايز وقت.. قيمة الإنجاز عنده عالية..
ما عندوش صبر..

وطبعًا دي احد الأسباب اللي بتعمل مشاكل في الحباة الزوجية..
واللي بتخلي الراجل يشتكي واحيانًا يقول مش هتجوز من الأساس..
اصلي عايز واحدة تنجز..

وبرضه أحد الأسباب اللي بتخلي الست مش سعيدة..
مضغوطة ومتوترة..
وبتخلي بنات مش عايزة تتجوز..
تتجوز وتجيب حي يضغطها ليه؟
ما هي كده عايشة براحتها، بسرعتها..

طيب عزيزي الراجل المستعجل..
الست اللي ربنا خلقها ست، بتحتاج تاخد وقت..
دي من سماتها كأنثى..
وقت تسرح شعرها، وقت تلبس، وقت تتزوق،
وقت تحط كريم على بشرتها..
وقت تهتم فيه بنفسها كأنثى..
تيجي امها تربيها انها ضروري تنجز..

بسرعة للمذاكرة والإمتحان والشهادة والتفوق علشان تنافسي الراجل اللي انت زيك زييه
ويجي الزوج يطلب منها الإنجاز، بسرعة تجهز علشان ينزلوا، بسرعة تعمل الأكل، بسرعة تشوف طلباته..

وتتحول الست اللي ربنا اداها ٩ شهور إعداد لإنها تكون أم..
وسنة لحد ما طفل يحبي..
وسنتين لحد ما ينفصل عنها بعد الفطام..
تتحول لكائن مضغوط مستعجل،
كل المطلوب منه السرعة والإنجاز علشان الراجل مستعجل..

وهي؟ تحس بالضغط..
وواحدة واحدة تبطل تحط كريم او تهتم بنفسها..
واحدة بواحدة تتحول لكائن بيجري ويلهث..
هرمون الكورتيزول عنده في السما..
وباين عليه العصبية وعدم السعادة..

ويجي الراجل يقول مراتي مهملة في نفسها..
ويجي غير المتزوجين يشوفوا حال المتجوزين فيقولوا نعمل في نفسنا كده ليه؟
خلينا على البر احسن..

عزيزتي الأنثى..
انت مش "بطيئة"، انت بطبيعتك كأنِثى بتحتاجي وقت..

عزيزي الراجل..
الأنثى مش راجل.. والإنجاز بسرعة مش من فطرتها الأساسية..
فطرتها الهدوء والصبر، الصبر لحد ما توصل للنتيجة..

اللي عايزين يتجوزوا عليهم الأول انهم يستوعبوا الفرق الجوهري..
بين الراجل والست..
وعليهم هما الإتنين بالصبر..

هو الصبر عليها..
وهي الصبر على إدراك النتائج..

الصبر.. هو اللي بيخلي الست تفضل كل يوم تغسل مواعين..
الصبر.. هو اللي بيخلي الزوجة كل يوم تحضر اكل..
الصبر.. هو اللي بيخليها مستحملة العيال وابو العيال..

لو ضغطنا عليها وطلبنا منها تتحول لكائن محب للإنجاز مستعجل زي الراجل..
مين هيصبر على كل التفاصيل الصغيرة اللي بتستهلك الستات في البيوت؟

نحمد ربنا على الستات اللي من فطرتهم الصبر..
وكفاية محاولات بائسة لتحويلهم لرجالة..
وكفاية ضغط عليهم بدعوى الإنجاز..

الصبر..الصبر يرحمكم الله

#اتجوز؟_٢٨
#الزواج
#اﻷسرة
#المجتمع
#السنة